O Hotel Congreso, en Teo, acolleu o pasado martes, 30 de setembro, a entrega de diplomas ás empresas formadas baixo o selo SICTED, un acto no que se recoñeceu o compromiso e calidade dos servizos dun total de 34 profesionais e empresas vinculadas ao turismo. Ames estivo representada por seis empresas, das cales cinco renovaron esta distinción e unha delas incorporouse por primeira vez á certificación.

Profesionais amesáns distinguidos
Os diplomas que se entregaron responden ás formacións que se realizaron durante o ano 2024. En total, seis empresas amesás foron distinguidas, das cales por primeira vez recibiu a certificación do SICTED o guía turístico Guía da Maía. As cinco empresas restantes, renovaron a súa distinción: Amextreme Kayak, Casa Abelleira, Casa do Boi, Hotel Payro e Onde Keiras.

O acto contou coa presencia de Xosé Manuel Merelles, director da Axencia de Turismo de Galicia; Lucía Calvo, alcaldesa de Teo; Cesáreo Pardal, presidente de do Clúster de Turismo de Galicia; e Guarina Rey, presidenta do GDR Terras de Compostela. En representación do Concello de Ames asistiu a técnica municipal de Turismo, Sonia Moure, que recolleu o diploma do Hotel Payro, do cal no puido asistir ningún representante. 

Sobre a distinción SICTED
O Sistema Integral de Calidade Turística Española en Destinos, SICTED, é un proxecto promovido pola Secretaría do Estado de Turismo de España que busca mellorar a xestión e a calidade dos destinos turísticos no país co obxectivo de ofrecer unha experiencia óptima para o  turista. 

Deste xeito, os establecementos distinguidos co selo SICTED, terán recoñecido e acreditado o seu compromiso pola calidade e mellora continua do seu servizo. Para acadar este recoñecemento é preciso que os profesionais e empresas vinculadas ao sector turístico realicen un plan de formación e cualificación.

Neste caso, o GDR Terras de Compostela, entidade xestora do xeodestino Terras de Santiago, é o encargado de impulsar esta iniciativa dende o ano 2019, coa idea de facer da calidade a súa marca diferencial á hora de atraer e fidelizar visitantes aos concellos que aglutina na comarca compostelá. Nas sete edicións formativas que leva desenvolvidas, son xa máis de sesenta os profesionais do sector turístico da zona que superaron os estándares marcados polo SICTED.