O alumnado da Escola Municipal de Música de Ames, a EMMA, celebra do 11 ao 19 de xuño, cinco xornadas de audicións de guitarra, percusión, saxo, piano, canto e frauta. Ditas audicións celébranse na Aula 10 do Centro multiusos de Aldea Nova. Ademais, o mércores 18 de xuño, celebrase o concerto de fin de curso na pista de fútbol sala, que está situada ao carón das piscinas municipais do Milladoiro. Os estudantes da EMMA mostrarán o aprendido ao longo do curso a familiares e amizades.

O pavillón municipal do Milladoiro acolleu este serán a gala de celebración do 20 aniversario da Escola Municipal de Música de Ames. O evento estivo dividido en tres bloques: pasado e recordos; presente e continuidade; e futuro e clausura. Houbo música a cargo do combo xuvenil e de antigos alumnos/as da EMMA como María Iglesias, Manuel Rodríguez (MRT) e Xián Ardións. Proxectouse un vídeo conmemorativo e fotos antigas e actuais. Falouse con antigos profesores/as e directores/as, antigo alumnado e familias, alumnado actual, profesorado actual, e ex-concelleiros que estiveron no goberno municipal durante estes vinte anos. O acto estivo presentando por Belén Martínez, xornalista de Ames Radio.

Esta mañá presentouse no auditorio da Casa da Cultura do Milladoiro a Gala 20 aniversario da Escola Municipal de Música de Ames, que se celebrará o venres 23 de maio, ás 19.30 horas, no pavillón municipal do Milladoiro. Haberá diversas actuacións musicais a cargo do combo xuvenil e de antigos alumnos/as da EMMA. Tamén se proxectará un vídeo conmemorativo da Escola Municipal de Música. Están convidados os alcaldes e concelleiros/as responsables da EMMA dende a súa creación, así como antigos profesores e profesoras que impartiron clase en dita escola. Esta gala enmárcase dentro da programación especial do 20 aniversario. Durante este curso hai arredor de 175 alumnos/as matriculados na EMMA.

Dende o Concello de Ames infórmase que debido á posibilidade de que este venres pola tarde caía algún chuvasco, trasládase o IV Encontro das Escolas Municipais de Música ao auditorio da Casa da Cultura de Bertamiráns. O horario de inicio mantense para as 19.00 horas. Nesta cuarta edición da xuntanza participarán, ademais do alumnado da propia Escola Municipal de Música de Ames (EMMA), as Escolas Municipais de Música de Muros e Caldas de Reis, o gañador do concurso "Quero Cantar" na categoría infantil, Gael, e as gañadoras dese mesmo certame na categoría xuvenil, Emma e Candela. A EMMA está a celebrar o seu vinte aniversario.