A radio municipal de Ames, Ames Radio, pechou a temporada de Radio Cidadá cun programa especial que se emitiu este pasado venres, 13 de xuño, pola tarde, dende o Pazo da Peregrina. O programa estivo dirixido pola xornalista de Ames Radio, Belén Martínez. Participaron en directo os responsables de nove programas que contaron como foi a súa andaina radiofónica deste ano e de tempadas anteriores. Ademais, emitíronse tres audios gravados previamente polos responsables doutros tres programas que non puideron asistir en directo. Outros tres programas emitidos durante esta temporada non puideron participar neste programa especial. O programa comezou cunha entrevista ao alcalde e concelleiro de Comunicación, Blas García, e pechouse cunha actuación musical do artista, Mad Martin, acompañado de Nico.

O Concello de Ames súmase á conmemoración do Día das Letras Galegas 2025, que, como cada ano, se celebrará o 17 de maio, e que este ano homenaxea ás cantareiras, personificadas en Adolfina e Rosa Casás Rama, de Cerceda; Manuela Lema, Teresa García Prieto e Prudencia e Asunción Garrido Ameixenda, de Mens, e Eva Castiñeira Santos, de Muxía. Dende o Concello de Ames compártese este recoñecemento público á lírica popular a través das Pandeireteiras da Costaneira e de Xela Jorge Meijide, pandeireteira, cantareira e mestra da sección de adultos das Escolas de pandeireta e baile tradicional de Bugallido.

O portal de observación social de ética e transparencia pública Dyntra continua situando ao Concello de Ames como a institución municipal máis transparente de Galicia, e colócao no posto número 72 de España. O Concello conta con 106 indicadores publicados dos 162 que recolle Dyntra, alcanzando así unha porcentaxe do 65,43% no índice DAM (Dyntra Ayuntamientos y Municipios), que inclúe aos municipios de máis de 15.000 habitantes. O Concello de Ames mellora resultados respecto ao pasado mes de marzo pasando do 63,58% ao 65,43% no índice DAM. A avaliación recolle seis apartados, nos cales Ames obtén as seguintes puntuacións: 73,85% en transparencia municipal; 69,70% en participación e colaboración cidadá; 51,85% en transparencia económica-financeira; 50% en contratacións de servizos; 65% en urbanismo e obras públicas e 0% en Open Data.

Ames Radio pon un ano máis os seus micrófonos a disposición da cidadanía para a elaboración de programas de radio. Calquera persoa, asociación ou entidade pode presentar os seus proxectos desde hoxe e ata o día 30 de setembro enviando o impreso de solicitude ao correo electrónico radio@concellodeames.gal. Aceptaranse proxectos presentados por entidades, asociacións ou persoas non empadroadas no concello, sempre que as súas propostas resulten de interese para o municipio amesán ou estean protagonizadas por persoas residentes, nadas ou que traballen en Ames. Cada proxecto deberá ser presentado por unha persoa coordinadora que deberá ter un mínimo de 18 anos de idade. Pódense consultar todos os detalles nas bases que regulan a Radio Cidadá premendo nesta ligazón.