O Concello de Ames, a través das Concellarías de Medio Ambiente e Servizos Básicos, organizaron o pasado sábado, 16 de marzo, unha exposición sobre o ciclo da auga para conmemorar o Día Mundial da Auga, que se celebra o 22 de marzo. Ademais, houbo diversos obradoiros e actividades, dirixidas a tódolos públicos. Moitas familias achegáronse ata a carpa instalada no paseo fluvial para participar en ditas actividades.

Manuel Rodríguez, Director Xeral de defensa do Monte, achegouse ata o Concello de Ames para coordinar co departamento de Xestión do Medio Rural os traballos pendentes de limpezas subsidiaras das vías e franxas secundarias. Nesta visita o Director Xeral puido reunirse co alcalde, Blas García, e co concelleiro de Xestión do Medio Natural, Javier Antelo.

O Concello de Ames vén de crear un apartado informativo dentro do departamento de Medio Ambiente sobre a Carballeira dos Trasgos. O obxectivo é dispor dun apartado específico con información da Carballeira de Paramuíño para os centros de ensino, asociacións e veciñanza en xeral. Dita carballeira atópase nas inmediacións do CEP de Ventín e do campo de fútbol de Biduído. A través da intervención realizada neste lugar colocáronse varias figuras dos animais típicos que habitan unha carballeira (vacaloura, bolboreta, macaón, donosiña, curuxa, píntega, peto real, xeneta, bubela, víbora, avelaíña e xoaniña). Tamén se recrearon os seres das nosos contos e lendas, como trasgos ou damas.

O Concello de Ames presentou esta semana a sétima fase do plan de prevención de incendios forestais mediante a plantación de frondosas caducifolias nas faixas secundarias de xestión de biomasa. En dita fase vaise actuar no ámbito 34 de Cruxeiras. Actuarase en faixas de xestión de biomasa, faixas de xestión de vivendas e faixas de xestión illadas. Dito ámbito contempla 350 parcelas. A superficie das parcelas ascende a 66,07 hectáreas, das cales 28,44 hectáreas son superficie de xestión. Dende o outono/inverno de 2016/2017 actuouse en Piñeiro, Mercuto/Os Batáns, Ventosa/O Bosque Animado, Tapia, Montemaior e Ortoño. Asináronse coa veciñanza un total de 272 convenios para plantar ese mesmo número de fincas. Dende 2016 actuouse nunha superficie total de 234.667 metros cadrados e plantáronse 6.008 plantas.