O Concello de Ames, a través do departamento de Benestar Social e Igualdade, instalará, por terceiro ano consecutivo, unha caravana morada no Milladoiro, este martes, 5 de agosto; e outra en Bertamiráns, o xoves día 7, con motivo da programación que se vai desenvolver en ámbalas dúas xornadas polas festividades da Madalena e da Peregrina. No caso do Milladoiro, estará colocada nos arredores da Casa da Cultura, mentres que en Bertamiráns estará situada a carón da zona de aparcamento do Pazo da Peregrina. En ámbalas dúas xornadas, a caravana estará operativa en horario de 22.00 a 5.00 horas. 

Paula Castiñeira Olveira, veciña do Milladoiro, é a gañadora da segunda edición do concurso fotográfico LGTBIQ+, que se enmarca na campaña “Ames a quen ames faino con orgullo”. Na segunda edición deste concurso participaron 4 persoas. O obxectivo do certame, que organizou a Concellaría de Benestar Social e Igualdade, é a loita contra a discriminación e promover a igualdade e a diversidades con respecto á comunidade LGTBIQ+. O premio do concurso será entregado mañá durante o acto de conmemoración do Día Internacional do Orgullo LGTBIQ+, que se vai celebrar dende ás 11.00 horas no Paseo da Igualdade, ao carón do pavillón polideportivo do Milladoiro. Darase lectura ao manifesto institucional e haberá actividades para todos os públicos con talleres de pintura de bolsas, obradoiros de pintura de pedras e mural, taller de pulseiras e para elaborar espetadas de lambonadas, música, e unha Holi Party.

Este xoves, a partir das 17.00 horas, a Praza da Maía, en Bertamiráns, acollerá o evento benéfico ‘Piccolo Pizzaiolo’, organizado polo restaurante Sicilia in Bocca e no que colabora o Concello de Ames a través da Concellaría de Benestar Social. Ao longo de toda a tarde, haberá un taller dirixido para a rapazada de entre 5 e 10 anos, no que aprenderán a facer as súas propias pizzas, música en directo e degustacións, entre máis propostas. O evento é gratuíto e, quen o desexe, poderá depositar nunha caixa a doazón económica que considere. Todos o recadado neste evento, irá destinado á asociación ASANOG (Asociación de Cancro Infantil e Xuvenil de Galicia). 

A praza da Maía de Bertamiráns acolleu o pasado sábado un novo Encontro Intercultural. A xornada incluíu a degustación de diversos pratos típicos de Venezuela, Perú, Colombia, Brasil, Guatemala, Marrocos, Exipto e Siria. Os asistentes puideron degustar arredor de 30 receitas de pratos, sobremesas e bebidas. Ademais, houbo música venezolana a cargo do artista Misael Sánchez e dous músicos, unha agrupación de nenos e nenas peruanos/as, e do grupo Batuko Tabanka. A xornada estivo organizada polo Concello de Ames e contou coa colaboración da Asociación de Peruanos de Santiago e da Asociación Sociocultural de Venezolanos en Santiago de Compostela (AVESANTI). Pódese acceder á galería completa do evento na seguinte ligazón.