O club de Taekwondo TKDenodo organiza, coa colaboración do Concello de Ames e por delegación da Federación Galega de Taekwondo e a Secretaría Xeral para o Deporte da Xunta de Galicia, o campionato provincial en idade escolar das modalidades exhibición, técnica e freestyle de Taekwondo. O torneo terá lugar o sábado, 25 de abril, no polideportivo do Milladoiro a partir das 9.30 horas. Participan rapaces e rapazas de 6 a 16 anos do programa Xogade. Esta proba clasificará para o campionato galego, que terá lugar o vindeiro sábado, 9 de maio, na Coruña.

Os deportistas amesáns do club Squash Santiago, Thiago Vilas e Lucas Castillo acadaron cadansúa medalla de ouro nas categorías sub-13 e sub-17, respectivamente, no Campionato de España de squash celebrado a pasada fin de semana, entre os días 10 e 12 de abril, nas instalacións do Squash Ponferrada. Ademais destes dous ouros, outros tres deportistas do club Squash Santiago acadaron medalla: Pedro Alonso logrou a medalla de prata na categoría sub-13; Mara Prieto conseguiu un valioso bronce na categoría sub-17 feminina e Gael Prieto foi bronce na categoría sub-17 masculina. Ademais, participaron Roi Carreira, Nicolás Castro e Mauro Vilas na categoría sub-17.

A Xunta de Goberno Local aprobou o pasado 20 de marzo unha nova liña de achegas para a concesión de bolsas para deportistas do concello de Ames no ano 2026. O importe das bolsas que se van a conceder ascende a 10.000 euros, ao igual que na anterior convocatoria. Esta convocatoria de bolsas ten por obxecto apoiar a práctica e ao rendemento deportivo, así como posibilitar a participación dos/as deportistas do concello en eventos deportivos, facilitándolles o acceso a unha preparación integral idónea. Cada deportistas pode optar a unha axuda máxima de 700 euros. O prazo de solicitude estará aberto do 28 de marzo ao 27 de abril. Premendo nesta ligazón pódense consultar as bases da convocatoria.

A Escola de Karate Dokkodo asinou a pasada fin de semana unha das súas actuacións máis destacadas no Campionato Galego Infantil 2026. Cunha expedición formada por once deportistas, o club amesán logrou un balance de 12 medallas (2 ouros, 4 pratas e 6 bronces), o que lles permitiu acadar un brillante sexto posto no medalleiro xeral, situándose entre as entidades máis potentes do karate galego.