O éxito da escola estivo marcado pola capacidade dos seus karatecas para render ao máis alto nivel tanto en Kata (técnica) como en Kumite (combate). Os dous títulos autonómicos chegaron na modalidade de loita. Vera Quintas alzouse co ouro en Kumite Alevín feminino (-26 kg), mentres que Martina Barreiro fixo o propio en Kumite Xuvenil feminino (-42 kg) tras un torneo impecable.

A eficacia de Dokkodo quedou patente coas catro medallas de prata obtidas por Tiago Blanco (Kata Alevín), Vera Quintas (Kata Alevín), Xián Blanco (Kumite Infantil -45 kg) e Jadel Rodríguez (Kumite Xuvenil -60 kg).

Un medalleiro moi repartido
O club completou a súa actuación con seis bronces que amosan a profundidade técnica do equipo: Breixo Regueiro (Kata Benxamín), Xián Blanco (Kata Infantil), Mateo Quintas (Kata Xuvenil), Martina Barreiro (Kata Xuvenil), Tiago Blanco (Kumite Alevín -34 kg) e Santiago Ribas (Kumite Cadete -52 kg). Ademais, Martín Campos logrou un quinto posto e Iván Carballo unha sétima posición, acadando ambos postos de diploma.

Próxima parada: probas de selección para o Campionato de España 
A actividade para a Escola Dokkodo non se detén tras este éxito autonómico. Grazas aos seus excelentes resultados, os medallistas do club viaxaron este pasado sábado, 21 de marzo, para participar nas probas de selección da Federación Galega. Nestes adestramentos clasificatorios, os deportistas da Escola Dokkodo medirán as súas forzas cos mellores de cada categoría co obxectivo de facerse cun oco na lista definitiva que representará a Galicia no vindeiro Campionato de España.

Traballo de base e futuro 
Dende a dirección da escola amosaron a súa satisfacción polo traballo realizado, destacando que “este sexto posto no medalleiro é froito da constancia e o esforzo diario de todo o grupo de alumnos e familias que forman parte do club amesán. Este resultado consolida a Dokkodo como un referente na formación de base e un motor do deporte en Ames”.