Este xoves, 13 de agosto, ás 21.00 horas, o campo da festa de San Amaro, en Barouta, acolle a terceira entrega do programa dos Seráns de Ames 2026, a primeira do mes de agosto. Nesta xornada, o público poderá gozar das recentemente galardoadas coa medalla do Concello de Ames As Maianas. A última sesión será o vindeiro xoves, 27 de agosto, con contacontos, xogos populares, teatro e música na praia fluvial de Tapia.

O Festival Emerxente de novos artistas regresou onte a Bertamiráns coa súa segunda edición e unha gran afluencia de público durante todo o evento, chegando a reunir arredor de 1.000 persoas ás 22.00 horas, durante o concerto do artista do Xallas L1gido. Ademais, durante a tarde reuníronse nun mesmo cartel Alddara, Fran Saint Laurent, Metan e Dupliss, todos eles artistas emerxentes do panorama urbano galego. Este evento enmárcase dentro do Ames en Festas 2026

O Festival Emerxente de novos artistas regresa esta semana a Bertamiráns cunha nova edición e un cartel cheo de artistas de nivel. Deste xeito, o xoves 6 de agosto, ás 20.00 horas, o parque do Ameneiral xuntará nunha mesma noite a L1gido, Alddara, Fran Saint Laurent, Metan e Dupliss. O evento está organizado polo departamento de Mocidade do Concello de Ames e forma parte do programa de Ames en Festas 2026.

Este venres, 31 de xullo, a localidade do Milladoiro acollerá un ano máis o festival Millarock, unha das citas máis esperadas na localidade amesá e que este ano chega á súa décimo quinta edición. O evento, organizado polo departamento de Cultura do Concello de Ames en colaboración coa da Rede Cultural da Deputación da Coruña, ten como obxectivo promover o rock galego e impulsar a grupos emerxentes da contorna de Ames. Nesta cita musical actuarán os grupos Tentáculo Rock, Sr Salvaje, Familia Caamagno, Extrema Función e Factoría de Subsistencia. Ademais, por segundo ano consecutivo, o persoal da escola de rock “A Casa do Rock” encargarase dos concertos didácticos e de impartir obradoiros musicais coa proposta “Merenda Rock”. Tamén por segundo ano consecutivo, nesta edición búscase achegar o rock a todos os públicos e ofreceranse servizos para que as persoas con discapacidade tamén poidan gozar do festival.