A área deportiva de Bertamiráns vai acoller o vindeiro mércores, 14 de maio, unha exhibición de medios da Garda Civil. Pola mañá, de 10.00 a 14.00 horas, a exhibición está dirixida ao alumnado dos centros educativos, mentres que pola tarde, de 16.00 a 18.00 horas, o acceso será libre para a veciñanza que queira acudir. A través desta actividade o servizo da Garda Civil ofrece unha exhibición dos seus servizos. Ao mesmo tempo faise unha recollida de alimentos non perecedoiros. Anímase a veciñanza a colaborar nesta iniciativa solidaria. Todos os produtos que se recollan serán doados a Cáritas Milladoiro e Cáritas San Xoan de Ortoño.

O Concello de Ames presentou esta mañá a programación elaborada con motivo do Ano Castelao. Dita presentación realizouse na Casa da Cultura de Bertamiráns con motivo da exposición dunha reprodución do cadro “A derradeira leición do mestre”. O grupo Chévere fixo unha reprodución do cadro para presentala en contextos públicos diversos, asociada a un breve cuestionario ao que se accede desde un código QR. Esta actividade enmárcase no proceso de creación da nova obra de teatro que a compañía está preparando. Trátase dun espectáculo protagonizado por Patricia de Lorenzo e Miguel de Lira, que toma como punto de partida o cadro de Castelao, para falar de como se constrúen as narrativas da memoria. Trala presentación, ás 12.30 horas, as persoas maiores do obradoiro de memoria de Amessán asistiron a unha charla con Patricia de Lorenzo e Xesús Ron de Chévere na que falaron sobre “A derradeira leición do mestre”.

O pasado 24 de abril, o Centro Cultural Mahía de Bugallido acolleu a última das sesións do programa “Abril, mes da saúde en Bugallido”, un ciclo de xornadas de divulgación para achegar á veciñanza diferentes aspectos relacionados co ámbito sanitario e o noso benestar. Nesta última sesión, a médica e xefa do Servizo de Medicina Nuclear do Complexo Hospitalario Universitario de Santiago de Compostela, Virginia Pubul Núñez, impartiu unha charla sobre a especialidade da medicina nuclear.

A Concellaría de Mocidade continúa a organizar diferentes actividades nunha nova edición do programa Trouleando. Desta vez, os mozos e mozas amesáns poderán gozar o vindeiro 25 de maio dunha xornada de ‘Humor Amarillo’, un xogo no que os participantes teñen que realizar varias probas do máis orixinais. A actividade é de balde e está dirixida para a mocidade nada entre 1995 e 2012. O prazo para inscribirse comeza este mércores, día 7 de maio, e estará aberto ata o vindeiro luns, día 12. Para participar, é preciso enviar a ficha de inscrición cuberta e asinada ao enderezo xuventude@concellodeames.gal. Hai 50 prazas dispoñibles e adxudicaranse pola orde de chegada das solicitudes. Pódese descargar a ficha de inscrición na seguinte ligazón.