O Goberno municipal, a través do presidente do Consello e concelleiro de Educación, David Santomil, trasladou á comunidade educativa os principais avances nos proxectos de ampliación do CEIP Agro do Muíño e do novo CEIP do Milladoiro, que está a redactar a Xunta de Galicia e que xa se atopan en trámite de autorización urbanística no Concello de Ames.

As ANPAS de Ames, que representan aos centros de ensino infantil, primaria e secundaria, trasladaron diferentes cuestións sobre os comedores escolares, os protocolos Covid e realizaron propostas de mellora no mantemento dos centros escolares, en particular nos patios e zonas exteriores.

Dende as ANPAS tamén trasladaron ao Consello Sectorial a necesidade de facilitar e simplificar os trámites de renovación e matrícula nos programas de conciliación municipal, así como realizar unha enquisa de valoración ás familias sobre os servizo de comedores. A este respecto, a Concellaría de Educación comunicou a intención de licitar a creación dunha nova aplicación para a web www.conciliames.gal.

O regulamento do Consello Sectorial de Educación aprobouse definitivamente en xaneiro de 2022 e esta foi a primeira xuntanza ordinaria. No mes de xuño, antes de finalizar o curso escolar 2021-2022 convocarase ao Consello Escolar Municipal para trasladar estas e outras cuestións que afectan ao conxunto da comunidade educativa.