A segunda campaña de recollida de louza e aveños “Doando sempre gañas” tamén rematou cun grande éxito de colaboración e solidariedade, conseguindo xuntar uns 320 quilos de louza aproximadamente. Pratos, vasos, cuncas, canecas, cubertos, potas, tixolas, e calquera tipo de aveño básico contou para sumar e axudar ás persoas do concello que máis o precisen.

Deste xeito, a tenda Máis que louza colaborou coa Oficina do Voluntariado de Ames, recollendo a louza dende o 1 de xullo ata o 1 de setembro, e gardándoa ata ser recollida por este departamento municipal, que xa xestiona outras campañas de recolección ao longo do ano, como de alimentos ou de agasallos. O material recollido súmase aos máis de 300 quilos recollidos na primeira campaña solidaria que se realizou do 15 de marzo ata o 16 de abril. En total xuntáronse preto de 650 quilos de material.

A solidariedade da veciñanza tivo tamén a súa recompensa, xa que todas aquelas persoas que realizaron doazóns gozaron dun desconto do 5% no propio establecemento durante o propio día no que se realizou a doazón.

Unha vez que a louza e os diferentes aveños foron recollidos e almacenados pola Oficina de Voluntariado durante o mes de setembro, o servizo comezou xa a repartir e distribuír as doazóns entre a poboación amesá que os necesite. A concelleira de Benestar Social, Luisa Feijóo, “agradece a solidariedade da veciñanza amesá, que unha vez máis, demostrou que cando se organizan iniciativas solidarias está disposta a axudar. Este tipo de colaboracións reverten no propio concello, para seguir sumando e axudando entre todas e todos”.

Novas relacionadas:

El Correo Gallego: "A tenda Máis que louza recolleu ata 320 quilos de doazóns de vaixela"

AMSGO!: "A tenda ‘Máis que louza’ de Bertamiráns recolle 320 quilos de doazóns na campaña “Doando sempre gañas”"