O Concello de Ames aposta decididamente pola educación alimentaria e isto vese reflectido no servizo da Rede Municipal de Comedores Escolares. Os comedores escolares de Ames foron pioneiros á hora de ofrecer un servizo de xestión alimentaria directa que comeza e completa o ciclo, desde a elección do menú e a compra ata a cociña e a mesa, sen pasar por mans alleas. Mentres que a meirande parte dos comedores escolares de Galicia e mesmo do resto do estado están xestionados por ANPAS e servidos por empresas de cátering, Ames decidiu facerse cargo do servizo dun xeito integral.

Ademais, o Concello de Ames dispón dunha técnica en nutrición e dietética que, en colaboración coa coordinadora da Rede Municipal de Comedores Escolares, é a encargada da elaboración dos menús que se serven nos comedores municipais. A elaboración dos menús faise semanalmente de xeito que non se repiten e á vez empréganse ao máximo os produtos de tempada ofrecidos puntualmente polo proxecto Lentura deste Concello. Ademais, esta técnica encárgase de atender os casos de tratamentos alimentarios especiais. Durante o curso 2012-2013 estanse atendendo un total de 106 casos de tratamento alimentario especial.

Tendo en conta o gran traballo que se realiza na Rede Municipal de Comedores Escolares o Concello de Ames decidiu concorrer aos premios NAOS dentro do apartado de promoción dunha alimentación saudable no ámbito escolar. O premio Estratexia NAOS á promoción dunha alimentación saudable no ámbito escolar concedéselle a aquelas iniciativas que se distinguen pola súa capacidade para inculcar hábitos alimentarios saudables entre os escolares dos centros de ensino infantil, primaria e secundaria, tanto a través de actividades realizadas na aula como extraescolares.

Promoción dunha alimentación saudable
A concesión destes premios inclúese no marco da Estratexia NAOS que, desde o Ministerio de Sanidade, Servizos Sociais e Igualdade, pretende impulsar as iniciativas que entre os seus obxectivos básicos impulsen a prevención da obesidade e outras enfermidades crónicas derivadas, a través dunha alimentación saudable e a práctica regular de actividade física.

O incremento da obesidade entre os nenos e nenas impulsaron ao Ministerio de Sanidade, Servizos Sociais e Igualdade a pór en marcha, a través da Axencia Española de Seguridade Alimentaria e Nutrición, a Estratexia para a nutrición, actividade física e prevención da obesidade (Estratexia NAOS) no ano 2005. O obxectivo desta estratexia é sensibilizar á poboación do problema que a obesidade representa para a saúde e impulsar as políticas e programas dirixidos a mellorar os hábitos alimentarios e promover a práctica de actividade física.

Desde que se instituíron estes premios no ano 2007, quíxose recoñecer e dar visibilidade, a aquelas iniciativas consideradas exemplares e que mellor contribuíron á consecución dos obxectivos propostos na Estratexia NAOS, promovendo a cooperación entre as administracións e os actores sociais e económicos implicados.

Co fin de abarcar os diferentes ámbitos nos que se desenvolve a Estratexia NAOS, establecéronse oito modalidades de premios. Sete deles outórganse ás iniciativas desenvolvidas nestes ámbitos desde que se iniciou a Estratexia NAOS, no ano 2005. Existe unha oitava modalidade de especial recoñecemento á traxectoria profesional.

Contido relacionado

El Correo Gallego: "A Rede Municipal de Comedores Escolares de Ames concorre aos premios NAOS"