​Trinta entidades e axentes que interveñen na localidade do Milladoiro participaron no encontro para coordinar actuacións, facilitar canles de comunicación e mellorar a convivencia, entre elas: Alcaldía, Concellaría de Educación e Mocidade, Concellería de Benestar Social, Igualdade e Voluntariado, servizos sociais, bombeiros, Policía Local, Garda Civil,  representantes das ANPA do IES do Milladoiro e o CEP de Ventín, Centro de Saúde, Inspección educativa e diversas asociacións: Asamblea de cooperación pola paz, Agareso, Areté, Secretariado Xitano e unha representante da UACO Raogal.

​Esta xuntanza foi a primeira do curso escolar como toma de contacto. Está previsto que a medida que o ano escolar vaia transcorrendo se realicen máis para analizar a conveniencia das estratexias de convivencia e solucionar posibles incidencias puntuais que poidan ir xurdindo.

​Que é a Rede do Milladoiro?
​A rede do Milladoiro é unha iniciativa posta en marcha no curso 2015/2016 e constitúe unha mesa de traballo coas institucións implicadas na vida do IES do Milladoiro orientada a mellorar os resultados a partir do intercambio de experiencias e coordinación de actuacións coa finalidade de que os seus beneficios cheguen a toda a comunidade local.
​
Agás o paréntese representado pola pandemia da Covid-19, a través da rede desenvolvéronse numerosas actividades, entre outras, encontros entre o alumnado de diversas etapas e cursos, obradoiros interculturais, encontros cos sectores profesionais da zona, xornadas de orientación académica-laboral, conferencias, guías e programas de mellora de rendemento escolar.

Novas relacionadas:

El Correo Gallego: "A Rede do IES do Milladoiro traza as liñas de traballo do novo curso"

Ames Go: "A Rede do Milladoiro pon en marcha o curso"