Preto de 25.000 persoas están chamadas ás urnas en Ames nas vindeiras eleccións ao Congreso dos Deputados e ao Senado. Este xoves pola mañá, ás 9:45 horas, celebrouse unha sesión plenaria que serviu para elixir ás persoas que ocuparán as 35 mesas electorais do Concello de Ames nas próximas eleccións xerais, que se celebrarán o día 23 de xullo.

Este proceso levouse a cabo de xeito aleatorio e para iso empregouse un sistema informático no que se meten todas as persoas censadas con dereito a voto que hai no municipio amesán e, de xeito automático, procédese ao sorteo para determinar os integrantes das mesas electorais.

Nestas eleccións haberá 20 seccións, 35 mesas e 14 locais electorais, ao igual que sucedeu nas pasadas eleccións municipais celebradas o 28 de maio. A estas eleccións están chamados un total de 24.906 electores. Respecto das anteriores eleccións xerais, celebradas o 10 de novembro de 2019, incrementou o censo electoral en 899 persoas. O censo das anteriores eleccións foi de 24.007 electores.

O Milladoiro será o núcleo que contará cun maior número de mesas electorais ao ser a localidade con máis poboación con dereito a voto. Deste xeito, O Milladoiro conta con 10.093 electores e 12 mesas electorais, mentres que Bertamiráns dispón de 9 mesas electorais e 6.945 electores. O número total de electores entre Bertamiráns e O Milladoiro ascende a 17.038. O resto de electores, que son 7.868, están repartidos polas urbanizacións do municipio, así como pola zona rural, e disporán de 14 mesas electorais.

Durante as próximas datas, o persoal do Concello de Ames notificaralle a todas as persoas que saíron elixidas que mesa electoral teñen que ocupar. Cada mesa electoral está formada por 3 persoas (1 presidente e 2 vogais) e hai 2 suplentes por cada membro. Polo tanto, por cada mesa electoral realízanse 9 notificacións.

Constitución da Xunta de Goberno Local
Antes da celebración de dito pleno, ás 9.30 horas, realizouse a sesión constitutiva da Xunta de Goberno Local. En dita sesión tamén se realizou a aceptación das delegacións efectuadas pola Alcaldía.

Cómpre lembrar que a Xunta de Goberno Local está composta por Blas García, que na súa calidade de alcalde actúa como presidente, Susana Señorís, Víctor Fernández, Ana Belén Paz e Gustavo Nieto. Deste xeito, redúcese o número de concelleiros/as que forman a Xunta de Goberno Local pasando de sete a cinco membros. As sesións ordinarias da Xunta de Goberno Local realizaranse os xoves, ás 9.30 horas, coa periodicidade que se fixe no pleno de organización.