O Concello de Ames presenta a programación infantil con Apego para os vindeiros meses de setembro, outubro, novembro e decembro. Dirixido a un público familiar, con especial incidencia nas familias con crianzas de 0 a 6 anos, o programa ten como un dos obxectivos transversais contribuír á socialización en galego da infancia. Así, o programa acolle o desenvolvemento de diferentes actividades, cuxa organización corresponde aos diferentes departamentos municipais que traballan conxuntamente para a súa elaboración, como é o caso do propio departamento de Normalización, Cultura e Biblioteca.

A programación estrease os días 28 e 29 de agosto e o 4 e 5 de setembro da man de Cé Orquestra Pantasma, que volve a Ames coas xornadas “Brincadeiras Miudiñas”, nas que un inquedo xogueteiro irá guiando aos nenos e as nenas polo mundo dos xogos e dos xoguetes miudiños a través de rimas, música, baile e obradoiros. As brincadeiras estarán no Milladoiro, no parque dos Piñeiros, ao carón da piscina descuberta municipal, os mércores 28 de agosto e 4 de setembro, mentres que en Bertamiráns estará nos xardíns do Pazo da Peregrina os xoves 29 e 5 de setembro. A actividade realizarase en ambas as localidades en horario de 18.00 á 20.00 horas.

A programación continúa durante o mes de setembro con contacontos nas bibliotecas municipais o mércores 18 en Bertamiráns e o xoves 19 no Milladoiro. Todos os contacontos comezarán ás 17.30 horas. Para o 27 de setembro está previsto que haxa unha nova Foliada con Apego, que estará dinamizada por Pablo Díaz e Olga Kirk. Será no Pazo da Peregrina, en Bertamiráns, ás 18.00 horas. Esta actividade, dirixida tanto a familias con crianzas como a calquera persoa á que lle guste a música tradicional, busca construír un espazo de socialización en galego onde poder compartir, cantar, bailar e aprender cancións tradicionais galegas.

En outubro volverá haber contacontos nas bibliotecas municipais os días 2, 17 e 30 no Milladoiro e os días 3, 16 e 29 en Bertamiráns. Ademais, organízase para o venres 4 na Casa da Cultura do Milladoiro a xornada de contos: Nano vai á escola, a cargo de Raquel Queizás. O venres 11 chega á Casa da Cultura de Bertamiráns o espectáculo Comenoites de Os Náufragos Teatro. Haberá dúas sesións: ás 17.00 e ás 18.00 horas. Unha fermosa historia coa que as crianzas descubrirán os misterios da existencia do día e da noite.

A última fin de semana de outubro volve un ano máis o Festival de maxia: maxia de estrelas, que se desenvolverá nos auditorios das Casas da Cultura de Bertamiráns e Milladoiro os días 25, 26 e 27. Esta é unha das actividades que teñen máis éxito entre a veciñanza amesá. En outubro publicarase o programa de dito festival.

Programación para novembro
Durante o mes de novembro destaca a sesión de contos para perderlle o medo ao medo, O home do saco e outros contiños de menos medo, a cargo de Celso F. Sanmartín, que se realizará o venres 8, ás 17.00 e as 18.00 horas (haberá dúas sesións), no Pazo da Peregrina, en Bertamiráns. Durante o mes de novembro tamén haberá contacontos nas bibliotecas: os días 13, 27 no Milladoiro e os días 14 e 28 en Bertamiráns. As actividades continúan o xoves 14, ás 17.00 e as 18.00 horas (tamén haberá dúas sesións) co obradoiro Quen Canta Alí?, de Luís Prego e Fabaloba, no Pazo da Peregrina. Trátase dunha nova aventura da nena Alí, desta volta canda unha avoíña moi especial que nos vai abrir os ollos e as orellas para saber quen canta alí.

Os días 15, 16 e 17 de novembro desenvolverase nas Casas da Cultura de Bertamiráns e do Milladoiro unha nova edición de Cinema Crianza. Neste festival internacional de cine infantil e familiar trátase de promover o gusto polo cinema entre os máis cativos. Haberá ademais actividades paralelas como sesións musicais, obradoiros... que converterán as crianzas en creadoras e participantes activas. Ademais, o venres 22, ás 18.00 horas, chega ao Pazo da Peregrina, en Bertamiráns, o obradoiro de arrolos de Mamá Cabra. As actividades de novembro rematan co espectáculo Nube, nube, sol, de Teatro ao Cubo. Será o venres 29, ás 17.00 e as 18.00 horas (haberá dúas sesións) na Casa da Cultura do Milladoiro.

En decembro volven os contacontos o día 11 á biblioteca de Bertamiráns e o día 12 á biblioteca do Milladoiro. Para o venres 13, ás 18.00 horas, está prevista a actividade Picadiscos MariFalti, no Pazo da Peregrina. Trátase dunha sesión de discoteca con música infantil para que os cativos e cativas non deixen de cantar e bailar, ao tempo que aprenden cancións da man dos libros da minibiblioteca ambulante de MariFaltri. O xoves 26, ás 18.00 horas, desenvolverase a Feira das linguas na Casa da Cultura do Milladoiro. Será un concerto teatrilizado e participativo para que os nenos/as se acheguen á historia da lingua desde os ritmos máis actuais, co obxectivo de promover o galego entre as novas xeracións. Por último, o venres 27, ás 18.00 horas, na Casa da Cultura de Bertamiráns, representarase o espectáculo Baila Roque baila de Baobab Teatro.

Para participar nalgunha das actividades recollidas no programa é necesaria inscrición previa enviando un correo electrónico ao enderezo: normalizacion@concellodeames.gal. Podes consultar o folleto coa programación completa no enlace que está dispoñible ao pé desta nova.

Información e inscrición das familias no programa Apego
O programa Apego é un proxecto colectivo que busca acompañar, dar apoio ás familias e poñer en valor a transmisión da lingua galega ás crianzas durante os seus primeiros anos de vida, nomeadamente dos 0 aos 6 anos. Con estes obxectivos ofrécese información, recursos e actividades variadas tanto para familias, coma para os nenos e nenas, educadoras e educadores... O proxecto pretende, ademais, que as crianzas se socialicen en galego e reforzar nelas a identidade coa familia e coas raíces a través de diferentes recursos lúdicos, formativos e informativos. En Ames, o programa do Apego conta xa con case 200 familias adheridas.

Así, as familias que estean agardando un bebé ou que teñan crianzas de 0 a 6 anos poden dirixirse ao Servizo de Normalización Lingüística municipal para inscribirse e recibir información de actividades e recursos que faciliten a socialización en galego da infancia. Ademais, se o neno ou nena ten menos dun ano, recibirán de agasallo unha caixiña de benvida con recursos útiles para a crianza. Pode solicitarse unha cita a través do teléfono 662 377 215. Para ampliar información sobre o programa pode consultarse a páxina web www.apego.gal.