Solapas principales

A programación do Ames Cultural para o primeiro semestre pecha este venres co espectáculo “Tabú”

Miércoles, 19 de abril de 2023

“Tabú”, de Colectivo Glovo, chega este venres, 21 de abril, ao auditorio da Casa da Cultura de Bertamiráns. O espectáculo, que dará comezo ás 20:30 horas, versará sobre a historia das mulleres integrantes de dous equipos de fútbol pioneiros a comezos do século XX, e enmárcase dentro do convenio de colaboración entre a Axencia Galega das Industrias Culturais (AGADIC) e o Concello de Ames. As entradas xa se poden adquirir a través da Billeteira electrónica do Concello de Ames.

A actuación de “Tabú” dura arredor de 60 minutos, e narra a historia de doce mulleres, retratadas nunha fotografía datada de 1925 por Manuel Riesco. Trátase de xogadoras de fútbol do Arnoia de Allariz e do Celanova, que posan con actitude desafiante e seria, e recollido ao estilo belle époque, baixo o título "Equipo de fútbol feminino no campo vello de Vilanova". Quen eran esas mulleres? Que sucedeu nese partido? Atopámonos ante unhas pioneiras do que a principios do século XX era un tabú? Fronte a eses interrogantes, o espectáculo ofrece un mergullo nas curiosidades das travesías de vida feminizadas.

“Tabú” diríxese ao público adulto e está creado por Esther Latorre e Hugo Pereira, que tamén interpretan a peza, xunto a Clara Ferrao, Sybila Gutiérrez, Fran Martínez e Paula Quintas. Para ver o teaser do espectáculo podes premer nesta ligazón.

Colectivo Glovo
Colectivo Glovo naceu no ano 2016 baixo a dirección de Esther Latorre (España) e Hugo Pereira (Portugal), xerando así un espazo de creación onde ambos, intérpretes e coreógrafos, desenvolven conxuntamente a súa faceta máis imaxinativa. Residentes en Galicia, traballan na creación da escena tanto para teatros coma espazos non convencionais, xa que un dos seus principais obxectivos como compañía é aumentar as dimensións do alcance das dinámicas do corpo. Glovo admite a súa paixón pola linguaxe do movemento e persegue a investigación das novas expresións escénicas partindo do propio corpo sen límites establecidos.

Paralelamente a esta faceta creativa, a compañía busca aportar semente ao tecido artístico presente na comunidade xerando espazos de colaboración con outras agrupacións e artistas procurando o achegamento entre o maior número de creadores, intérpretes e mentes-corpo inquedas, non só en Galicia, senón cunha proxección internacional notable, facendo especial fincapé no interese pola eliminación da barreira cultural invisible entre Galicia e o norte de Portugal.

A compañía formou parte do circuíto Red Acieloabierto, do catálogo Danza a Escena 2021, Danza a Escena 2023, do catálogo de recomendación da Comisión Asesora do Programa.cat 2023 de Cataluña e presentou en feiras como MAPAS Mercado Cultural ou a Feria Internacional de Teatro e Danza de Huesca, entre outros.

Venda de entradas
As entradas poden adquirirse na Billeteira electrónica do Concello de Ames, e teñen un prezo de 5 euros (a xeral) ou 2,5 euros (a prezo reducido). Poderán beneficiarse deste desconto do 50% os estudantes con carné de estudante, as persoas maiores de 60 anos e os menores de 12, as familias numerosas, os mozos e mozas con carné xove e as persoas demandantes de emprego.

Tamén se poderá mercar a entrada na propia Casa da Cultura de Bertamiráns, a partir dunha hora antes de que dea comezo o espectáculo, en caso de que non completase aínda o aforo. Rógase aos espectadores puntualidade.

Cartaz do espectáculo "Tabú"