A Festa do Entroido do programa Amessan celebrarase o próximo sábado, 26 de febreiro, de 17.00 horas a 20.00 horas, na Casa da Cultura de Bertamiráns. A temática do evento é libre e haberá premios para os mellores disfraces participantes. Dende a Concellería de Benestar Social recalcan que é unha festa aberta a todos os públicos. O importante é asistir disfrazado e pasar un bo rato de lecer.

Asemade, haberá música en directo con Ana Angueira. Para que todo o mundo poida asistir, está programado un servizo de autobuses coas paradas de costume nas diferentes parroquias. Para reservar praza para o servizo de autobús é necesario chamar ao  662 377 044 ou 683 327 378 antes do xoves 24 de febreiro, ás 14.00 horas.

A concelleira de Benestar Social, Luísa Feijóo, indica que “en 2021 non puidemos celebrar a festa de Entroido do programa Amessan debido ás restricións existentes naquel momento pola Covid-19. Agora, este ano retomamos esta festa que comezamos a celebrar no ano 2020. Animamos á toda a veciñanza amesá que así o desexe a asistir disfrazada a esta festa de Entroido”.

Programa Amessan
Este programa de envellecemento activo, destinado a persoas maiores de 60 anos, inclúe actividades de ximnasia terapéutica e de manualidades, así como obradoiros de música tradicional e de memoria, baile e bailoterapia. Estas actividades desenvólvense nas Casas de Cultura de Bertamiráns e do Milladoiro e nos locais sociais de Agrón, Ameixenda, Augapesada, Bugallido, Covas, Cruxeiras, Lens, Piñeiro, Tarroeira e Trasmonte.

Novas relacionadas

El Correo Gallego: "Volve o Entroido para todas as idades co programa Amessan na capital o 26"