A palilleira amesá Ana Rosa Lista e unha selección da súa obra viaxaron esta fin de semana a Portugal, á vila de Peniche, para formar parte unha edición máis da Mostra Internacional de Renda de Bilros, que se celebrou tras dous anos de parón pola pandemia entre os días 15 e 17 de xullo. Peniche, que conta cunha gran tradición no encaixe ou “renda de bilros”, acolleu na súa exposición a artistas de 12 países e unha serie de actividades, talleres, desfiles e actuacións.

Neste senso, Ana Rosa Lista foi unha das seleccionadas para mostrar os seus traballos, que beben de tradicións tan dispares como a galega, a holandesa, a rusa ou a italiana, e que combina con técnicas máis modernas e novidosas. Xunto a ela, o encaixe galego contou coa representación máis numerosa, con “stands” de artesás de Mos, Muxía e Ourense. A vila catalá de Arenys de Mar tamén contou con representación, ao igual que outros 11 países, como Bulgaria, Croacia, Eslovaquia, Eslovenia, Estonia, Inglaterra, Italia, Gales, Malta, Polonia e Portugal.

Ana Rosa Lista, formada na Escola Holandesa do Encaixe, ten realizado cursos de mestras tan destacadas como son Mariña Regueiro e Lia Baumaister-Jonkers. Imparte aulas na Casa Escola Obradoiro Ana Rosa, situada nas Punxeiras Altas, na parroquia de Ortoño, así como no local social da Tarroeira, na mesma parroquia, e no Pazo da Peregrina de Bertamiráns. Ademais tamén realiza obradoiros e charlas en diferentes puntos da xeografía galega, española e en países europeos.

Recentemente, no pasado mes de abril, a artista mostrou en Ames algúns dos seus últimos traballos, coa exposición  “Fiando Recordos”, un proxecto realizado ao longo de tres anos de traballo e que bebe da obra do deseñador, artista e xornalista galego Luis Seoane, e que puido visitarse no Pazo da Peregrina, en Bertamiráns, antes de que a mostra viaxara ao Museu d’Arenys de Mar, en Barcelona.

Na actualidade, a palilleira está envolta en novos proxectos e colaboracións, entre as que destaca un traballo inspirado na obra da fotógrafa estadounidense Ruth Matilda Anderson, que documentou para a Hispanic Society of America a vida en Galicia de comezos de século XX, e pola que coñecemos a día de hoxe unha parte importante da nosa historia recente. Lista presentará este proxecto no mes de agosto en Pontevedra.

Novas relacionadas:

La Voz de Galicia: "Encajes de Ames inspirados en la obra de la fotógrafa Ruth Matilda Anderson"

El Correo Gallego: "O encaixe galego viaxa a Portugal"