- Tematica
Na súa quinta edición, os “Seráns de Ames”, chegaron ás as parroquias de Ortoño, Covas e Transmonte. Ao longo das seis sesións que conformaron os seráns deste ano, a acollida entre a veciñanza foi positiva, contando cunha boa resposta do público ao longo de tódalas xornadas. Pódese acceder á galería dos seráns na seguinte ligazón.
O programa de verán “Seráns de Ames” orixinalmente naceu no 2021 como os ‘Seráns de Tapia’ ofrecendo só espectáculos na praia fluvial de Tapia. Paulatinamente, foi medrando e trasladándose a outras parroquias do rural, apostando por diversificar as propostas culturais de Ames a diferentes localizacións do concello.
A iniciativa, organizada polos departamentos de Bibliotecas, Mocidade, Cultura e Normalización Lingüística, ofreceu ao longo dos meses de xullo e agosto, un total de seis propostas en cinco parroquias do rural amesán, nas que se combinaron actividades musicais, teatrais, de circo e xogos para todo tipo de públicos. Nesta edición, as localizacións nas que se desenvolveron os seráns foron a praia fluvial de Tapia, a carballeira de Bugallido, e os campos da festa de Ortoño, Covas e Trasmonte.
Programación dos Seráns de Ames 2025
Os seráns deron comezo, un ano máis, na praia fluvial de Tapia o pasado xoves 3 de xullo co pregón inaugural, que estivo a cargo Inés Suárez, cantante do grupo As Maianas, e co espectáculo de circo, dirixido a público infantil, ‘Ghop! Teatro ao cubo’. O xoves 10, ás 20.00 o campo da festa de Ortoño estreouse nos seráns coa actuación musical ‘Lembra Xabarín’, unha proposta que invitou ao público a rememorar a época do Xabarín Club para os adultos e descubrilo para os máis pequenos.
O xoves 17 de xullo, foi a quenda de Covas, outra das parroquias que tamén se estreaban neste programa. Esta xornada contou con dúas propostas frescas e xuvenís, protagonizadas por xente nova. Por unha banda o concerto do grupo de mozos amesáns Teen, e, por outra, o grupo Ginko Biloba.
A actuación de Pablo Balseiro & Los Cascarillas foi a encargada de abrir a programación no mes de agosto, coa estrea de Trasmonte nos Seráns o pasado xoves día 14. A continuación, a carballeira de Bugallido acolleu na sesión do xoves 21, o espectáculo formado polas ex-integrantes de Leilía, Montse Ribera e Mercedes Prieto, As Armadanzas “Do Courel ao Condado”.
E, de novo, a praia fluvial de Tapia foi o escenario escollido para a derradeira xornada dos “Seráns de Ames”. O pasado xoves 28 de agosto, pechouse o programa coa proposta de 'Xogos miudiño', dirixida para as crianzas, e o concerto de Mary Iglesias, gañadora do Canta con Ames na categoría xuvenil na edición do 2022.
