A segunda edición dos Premios Mil Primaveras recoñece proxectos de posta en valor e fomento do galego que inciden na autoestima dos e das falantes, na reflexión sobre o uso da lingua e nos hábitos lingüísticos. Destacan os programas colaborativos e os que nacen ou se desenvolven no ámbito educativo.

Estes galardóns creáronse coa finalidade de valorar, recoñecer e difundir accións, campañas, programas e proxectos que teñen como obxectivo principal a posta en valor e o fomento da lingua e a procura do incremento do seu uso e/ou prestixio. Desta forma búscase recoñecer e proxectar o traballo ben feito no ámbito da normalización lingüística, dar visibilidade a proxectos positivos e seleccionar boas prácticas que poden servir como modelos.

O Concello de Ames desenvolve dous dos proxectos gañadores nesta iniciativa:

• Enreguéifate e Regueifesta. Recoñeceuse como proxecto estabilizado xa que leva máis de cinco anos en desenvolvemento. Forman parte del os SNL de Ames, Pontevedra, Rianxo, Santiago de Compostela e Teo e os promotores da Regueifesta. O xurado salientou que é un proxecto interxeracional, que revitaliza unha actividade tradicional conectándoa coa mocidade e introducindo valores transversais. Tívose en conta especialmente que traballa o aspecto oral, moi necesario para a normalización da lingua. Tamén se valorou a súa relación con proxectos semellantes fóra de Galicia e a súa crecente proxección, cunha imaxe moi coidada, atractiva e fresca. Así mesmo, recoñeceuse a importancia de que sexa un proxecto onde colaboran diferentes servizos de normalización lingüística e que implica de forma especial os centros educativos.

• Galegoempresas é tamén o produto da colaboración entre SNL, neste caso de Santiago de Compostela, Ames e Teo. Foi escollido como mellor proxecto sectorial por ser efectivo e exportable a outros concellos ou comarcas e por relacionar o uso da lingua con valores de calidade e proximidade. A xustificación da necesidade desta iniciativa chamou a atención do xurado, que destacou que con ela se promove o uso do galego en diferentes ámbitos: laboral, comercial, empresarial… Así mesmo, valorou a ferramenta de autodiagnose das propias empresas, o que permite que elas mesma reflexionen sobre a súa política lingüística e avancen conscientemente cara a un maior uso da lingua. Tamén salientou a boa comunicación e a dotación de recursos para as empresas.

Novas relacionadas:

El Correo Gallego: "Premio a Enreguéifate e Galegoempresas amesás"