O alcalde de Ames e concelleiro de Turismo, Blas García; a técnica municipal de Turismo, Sonia Moure; e a xerente do Albergue do Milladoiro e ecónoma da Asociación de Amigos do camiño Portugués en Ames e Teo, Eugenia González, estiveron presentes hoxe na estrea da caseta de atención ao peregrino e información turística do Milladoiro, localizada na contorna da Casa da Cultura de dito núcleo. Xunto a eles, tamén estivo presente Daniel Lorenzo, unha das dúas persoas que se encargaran de ofrecer este servizo.

Como novidade, este ano o servizo será ofrecido na contorna da Casa da Cultura do Milladoiro. O obxectivo deste servizo é acoller, prestar atención e facilitar información ás/aos peregrinas/os, así como difundir entre os residentes, visitantes e turistas os servizos e recursos culturais, patrimoniais e turísticos de Ames.

Colaboración con ASCAMPOR 
Esta iniciativa nace froito da colaboración do Concello de Ames coa Asociación de Amigos do Camiño Portugués en Ames e Teo. ASCAMPOR é unha asociación privada sen ánimo de lucro que fixa os seus obxectivos na divulgación da peregrinación a Santiago de Compostela e o Camiño de Santiago. Da colaboración da Asociación coa parroquia de San José do Milladoiro na atención aos peregrinos naceu o proxecto social Albergue Milladoiro que se inaugurou o pasado 10 de marzo de 2017.

Esta asociación ten como obxectivos a promoción do Camiño de Santiago e toda a súa contorna como elemento dinamizador dunha acción social, vinculada ás necesidades concretas do territorio; e maila acollida do peregrino. Tendo en conta estes obxectivos desenvolven un proxecto de inclusión social e primeiro emprego, a través do cal puxeron en marcha en 2017 o albergue do Milladoiro e agora o punto de atención ao peregrino e de información turística, en colaboración co Concello de Ames.

Horario de atención
O punto de atención turística, que estará dispoñible dende hoxe, 3 de agosto, ata o vindeiro 3 de outubro, conta cun horario de atención ao público de 10.00 a 14.00 horas e de 16.00 a 18.00 horas de luns a sábado. Os domingos e festivos o emprazamento permanecerá pechado. As persoas encargadas de ofrecer este servizo durante os vindeiros dous meses serán Daniel Lorenzo e Antonio Llecha.

Novas relacionadas

Bisbarra: "O punto de atención turística do Milladoiro comeza dous meses de actividade ata outubro"