A fotografía como documento forma parte do patrimonio histórico e en consecuencia é fundamental para a conservación da memoria colectiva dunha parroquia. Con dito obxectivo estiveron traballando durante os últimos anos os integrantes da asociación de veciños/as Pedra do Fuso, que realizaron un importante labor de documentación e recollida de fotografías antigas entre a veciñanza da parroquia de Ames. Deste xeito, contan com máis de 200 fotografías recollidas pola veciñanza da parroquia de Ames.

Agora, unha vez rematado o traballo de recompilación de ditas fotografías, queren editar un libro que recolla todo o traballo feito previamente. Para editar dito libro fotográfico solicitaron xunto co Concello de Ames a colaboración económica da Deputación da Coruña. O pasado 16 de marzo o concelleiro de Educación, Patrimonio Histórico e Axenda Urbana, David Santomil, acompañado do secretario da asociación de veciños/as Pedra do Fuso, Alfredo Sánchez, mantiveron unha xuntanza co vicepresidente da Deputación da Coruña, Xosé Regueira e co deputado de Patrimonio, Xosé Penas.

En dito encontro solicitaron a axuda económica da administración provincial para editar un libro de fotografías antigas da parroquia de Ames. O proxecto leva por nome Ames. Unha parroquia. Un concello. As fotografías son de temática moi variada e reflicten a vida da parroquia. Tamén existen fotografías históricas da emigración, do patrimonio da parroquia, de deportes, das festas, etc.

Paza audiovisual sobre Maximino Viaño
O libro - documental está composto por fotografías e por unha peza audiovisual sobre o cronista oficial do Concello de Ames, Maximino Viaño. Ademais, está previsto que o prólogo de dito libro sexa elaborado polo cronista oficial do Concello de Ames, Maximino Viaño, que recibiu no ano 2020 a medalla do Concello de Ames. Xa se pode ver un avance da peza audiovisual sobre Maximino Viaño.

O concelleiro de Educación, Patrimonio Histórico e Axenda Urbana, David Santomil, explica que “se trata dun proxecto moi atractivo que fala da historia da parroquia de Ames dentro do concello de Ames e que inclúe unha paza audiovisual sobre a Maximino Viaño, que será o que elabore o prólogo do libro”.

Ademais indica que “a asociación de veciños e veciñas Pedra do Fuso realizou un gran traballo de documentación que se vai plasmar neste libro – documental que incluiría máis de 200 fotografías antigas da parroquia de Ames, que mostran a vida da parroquia anos atrás e incluso da emigración e doutras actividades deportivas e das festas celebradas. A través desta iniciativa divulgaranse os recursos de recuperación patrimonial, destacando o valor do proxecto dende unha perspectiva moderna, dinámica e atractiva”.

Novas relacionadas:

AMS GO!: "Ames recolle a súa memoria fotográfica en 'Ames. Unha parroquia, un concello'"