A primeira tarde de cine de outono está a piques de chegar a Ames, que será a do vindeiro xoves 5, coa proxección do filme San Simón. Esta é unha produción de 2025 feita en galego, e que se enmarca dentro do xénero do drama. Está dirixida a persoas maiores de 12 anos e ten unha duración de 108 minutos. A dirección deste filme corre a cargo de Miguel Ángel Delgado e o reparto está composto por Alexandro Bouzó, Flako Estévez, Ana Fontenla, Manuel Landeiro, Guillermo Queiro, Darío Fernández Raposo, Lucía Amarillee Torrado e Xaime Vilasoa. Ademais, o director do filme, Miguel Ángel Delgado, participará na presentación do filme así como no posterior coloquio.

A historia sitúase en outubro de 1936, cando o réxime de Franco crea máis de trescentos campos de concentración por toda España: conventos, fábricas, escolas, prazas de touros, mosteiros e outros espazos pechados. A illa de San Simón destacaba pola súa insularidade, e o réxime converte o antigo lazareto nun lugar de morte onde os prisioneiros sofren a represión, rodeados dunha beleza abafadora. A historia continua sete anos despois, cando Lamas, un dos presos da illa, recorda a historia de homes e mulleres que, como el mesmo, sufriron a represión neste pequeno enclave da costa galega.

A programación do Cine de Outono continúa con dous filmes máis ao longo deste mes de novembro, no que tamén se poderán ver ver As Liñas Descontinuas, o seguinte xoves 12 de novembro; e Ao son da nova regueifa, un documental que se poderá ver o venres 20 de novembro. Todas as proxeccións serán ás 20.00 horas na Casa da Cultura do Milladoiro.

Segunda sesión: As liñas descontinuas
A segunda sesión do ciclo será o xoves, 12 de novembro, e poderase asistir a ver As liñas descontinuas. Trátase doutro drama en galego producido en 2025. Esta longametraxe está dirixida a persoas maiores de 12 anos e ten unha duración de 90 minutos. Está dirixida por Anxos Fazáns e o reparto está composto por Mara Sánchez, Adam Prieto, Alberto Rolán, Ana Fórneas, Lidia Veiga e Mónica García.

O filme conta a historia de Bea, unha muller de 50 anos que se está a separar do seu home. O día no que ten que abandonar o fogar no que viviu os últimos vinte anos chega á súa casa e atopa todo esnaquizado e a un dos ladróns durmido na súa cama. Denís é un rapaz transxénero de 28 anos que, aínda que estudou unha carreira, loita coa precariedade laboral e a falta de oportunidades. Logo de pasar tres días xuntos, cada un deberá continuar o seu camiño.

Terceira sesión: Ao son da nova regueifa
A terceira e última sesión do ciclo está prevista para o xoves 20 de novembro. Nesta xornada proxectarase o documental Ao son da nova regueifa, dirixido por Manolo Maseda e Saúl Rivas. Cunha duración de 60 minutos, este documental propón unha viaxe na procura das pontes construídas entre a regueifa tradicional e as súas expresións máis contemporáneas, afondando no proceso de recuperación e transformación desta arte da improvisación oral en Galicia.

Nun percorrido que atravesa o país de norte a sur, coñecemos regueifeiras e regueifeiros que nos abren as portas ao mundo do repentismo, traendo á fronte o talento, a creatividade e a diversidade que caracteriza a regueifa hoxe en día.

Neste itinerario que vai de Bergantiños a Vigo, non deixan de presentársenos unha serie de opostos: tradición e modernidade, aldea e cidade, aprendizaxe innata e pedagoxía… A través de testemuñas apaixonadas, versos improvisados e moita música, trázase un retrato poliédrico da regueifa contemporánea: unha arte con raíces fondas e ás abertas, disposta a seguir improvisando polos camiños do vento.

Novas relacionadas:

El Correo Gallego: "San Simón" abre este xoves a nova edición do Cine de Outono no Milladoiro"

Diario de Santiago: "O filme San Simón abre a nova edición do Cine de Outono este xoves 5 na Casa da Cultura do Milladoiro"