Con motivo da Startup Europe Week, que se está a celebrar dende o día 25 e que se prolongará ata o vindeiro 29 de maio, o espazo colaborativo A Proa acolleu está mañá, en horario de 9.00 a 14.00 horas unha xornada de portas abertas co obxectivo de mostrar como é traballar neste emprazamento e poder coñecer de primeira man a comunidade emprendedora que constrúe este centro de coworking.  

Durante esta xornada tamén se impartiu a charla formativa “Emprender sen filtros: compartindo os erros que máis ensinan”, un encontro próximo e participativo que levou aos asistentes a reflexionar sobre os erros máis habituais no emprendemento e transformalos en aprendizaxes útiles para construír proxectos máis sólidos e sostibles. 

O relatorio estivo conducido por Rosa Corral, asesora de emprendemento da Rede de Polos de Emprendemento e Apoio ao Emprego da Consellería de Emprego, Comercio e Emigración, con máis de 25 anos de experiencia en formación, emprego e emprendemento. Ademais, é empresaria e impulsora do proxecto agroalimentario La Colmena de Sofía. 

Nesta xornada, tamén estivo presente o director territorial da Consellería Emprego, Comercio e Emigración, Juan José Couce, quen pechou a xornada.  
A Startup Europe Week
A Startup Europe Week é unha iniciativa impulsada por Startup Europe e o Comité das Rexións da Unión Europea, e está centrada en axudar ao emprendedores a conectar cos seus ecosistemas locais e darlles a coñecer os recursos públicos e privados dispoñibles sen necesidade de marchar ás grandes cidades nin capitais. 

Neste proxecto participan máis de 350 cidades repartidas en 50 países, sumando así 250 coorganizadores locais e este ano está enfocado nas conversas reais sobre financiamento, acceso a capital, intelixencia artificial, deep tech e crecemento sustentable. A Startup Europe Week é o maior movemento de emprendemento rexional do mundo e este ano celebra a súa décima edición.