- Tematica
O equipo sénior masculino do Milladoiro vén de conseguir este pasado domingo, 18 de maio, o ascenso de forma matemática a segunda Futgal. O equipo amesán sumou un empate ante o CF Rarís que lle permite ascender de categoría. Na última xornada xogará ante a SD Araño para defender a primeira posición que ocupa actualmente na clasificación e conseguir deste xeito o campionato de Liga no primeiro grupo de fase de ascenso da terceira Futgal.
A falta dunha xornada para o remate do campionato de Liga o equipo sénior masculino do Milladoiro SD xa ten asegurado o ascenso de forma matemática e loitará a vindeira fin de semana por conseguir o título de Liga ante a SD Araño.
O equipo amesán xogará a domicilio na parroquia de Araño, pertencente ao concello de Rianxo, mentres que o segundo clasificado, o Porto do Son CF, que está a só un punto de distancia do Milladoiro SD, xogará tamén a domicilio contra o SH Palmeira.
O Milladoiro SD realizou unha gran temporada cuns números ata o momento de 8 vitorias, 3 empates e tan só 2 derrotas no grupo 1 de fase de ascenso da terceira Futgal.
O equipo amesán leva 34 goles marcados e 13 encaixados, sendo o equipo máis goleador e con menos goles encaixados. Ademais, o máximo goleador do grupo é Jhean Carlos Jaramillo Rojas con 10 goles en 12 partidos e unha media goleadora de 0,83 goles por partido.
