​Durante as últimas semanas o Concello de Ames estivo acondicionando dúas parcelas do Milladoiro para habilitar unha nova área de aparcadoiro público. Ditas parcelas están situadas na rúa Castelao, nunha zona moi próxima á avenida de Rosalía de Castro, e contan cunha capacidade de arredor de 300 prazas de estacionamento. No futuro existe a posibilidade de ampliar este aparcadoiro. Para iso o Concello tería que chegar a un acordo cos/as propietarios/as das parcelas anexas. 
​
Os traballos de acondicionamento consistiron en limpar as parcelas, achanzar o terreo, tapar as fochancas existentes e estender unha capa de grava. O firme non pode ser asfaltado xa que son parcelas privadas. O Concello dispón dunha cesión temporal destes terreos grazas aos convenios de cesión asinados cos/as propietario/as. Deste xeito, dende este martes, 14 de outubro, unha das parcelas dedicadas a aparcadoiro está operativa e pódese estacionar nela. A segunda parcela abrirá nos próximos días. Ademais, na actualidade o goberno municipal está traballando para habilitar novos aparcadoiros no núcleo urbano do Milladoiro.
​
O concelleiro de Obras e Servizos Básicos, Gustavo Nieto, destaca que “esta nova área de aparcadoiro dará servizo a un gran número de veciños e veciñas do Milladoiro. Atópase nunha zona moi próxima á avenida de Rosalía de Castro, polo que era necesario dispor dunha nova área de estacionamento nesta zona do Milladoiro. Ademais seguimos traballando para abrir novos aparcadoiros nesta localidade”.
​
Incremento de prazas de estacionamento no Milladoiro
​Estes novos aparcadoiros únense ao xa existentes no Milladoiro como son o aparcadoiro que está ao carón do centro comercial Supercor, na rúa Agro do Medio, á área de estacionamento que está na Travesía do Porto, e ao aparcamento da Casa da Cultura do Milladoiro. 
​
Esta nova área de estacionamento súmase ás máis de 300 prazas de aparcamento que se habilitaron nos últimos anos no parque empresarial do Milladoiro. Para elo reacondicionouse un espazo xa existente nas rúas Castiñeiras, Hedras, Oliveiras e Palmeiras, para incrementar as prazas de estacionamento e ao mesmo tempo habilitar novos accesos rodados ás zonas de estacionamento. Anteriormente tamén se habilitou un novo espazo de estacionamento na contorna do campo municipal de fútbol do Milladoiro, que dá servizo aos traballadores/as e usuarios/as do parque empresarial.
​
Novos aparcamentos en Bertamiráns
​Cómpre salientar que nos últimos meses tamén se abriron tres novos aparcadoiros públicos na localidade de Bertamiráns. Dous destes novos aparcadoiros están situados na Travesía da Peregrina, antes do cruce coa avenida de José Luis Azcárraga, e na rúa do Cómaro, en fronte ao centro deportivo da Telleira. O terceiro está na Travesía do Pedregal, nunha zona moi próxima ao centro de saúde desta localidade. Estímase que estas tres áreas de estacionamento teñen capacidade para máis de 300 vehículos.

Novas relacionadas: 

La Voz de Galicia: "O Milladoiro estrena un área de aparcamiento de 300 plazas gratuitas en la rúa Castelao"

El Correo Gallego: "Nueva explanada para aparcar trescientos coches en Milladoiro"

Diario de Santiago: "O Concello de Ames habilita unha nova área de aparcamento no Milladoiro con 300 prazas de estacionamento"

Xornal de Compostela: "O Concello de Ames abre unha nova área de aparcadoiro con 300 prazas no Milladoiro"