Os comerciantes, hostaleiros, autónomos e xestorías de Ames terán a oportunidade de formarse para a chegada de VeriFactu, o novo sistema de facturación verificable da Axencia Tributaria. A dixitalización avanza a pasos firmes e, en 2026, todos os comercios e establecementos hostaleiros deberán adaptarse a VeriFactu, o novo sistema de facturación verificable impulsado pola Axencia Tributaria.

Para axudar a todos os negocios do comercio local de Ames a anticiparse a esta obriga legal, o Concello de Ames organizará dúas charlas formativas gratuítas os próximos días 22 e 23 de setembro no espazo colaborativo A Proa, no Milladoiro, e no salón de plenos da Casa do Concello, en Bertamiráns. As dúas charlas impartiranse ás 10.00 horas no Milladoiro e en Bertamiráns. Esta formación será impartida por Lucía González, directora de marketing da empresa amesá PlaceIn.

A concelleira de Promoción Económica e Emprego, Ana Belén Paz, explica que “a través desta iniciativa preténdese facilitar que o comercio local dea un paso adiante na dixitalización e cumpra coa normativa de forma sinxela e segura. Durante estas sesións, dirixidas a todo o tecido empresarial (comerciantes, hostaleiros e autónomos de Ames) abordaranse de maneira práctica cuestións clave”.

A clave está en informarse con tempo e planificar a adaptación para non ter que improvisar no último momento”, sinala Lucía González, directora de Marketing de PlaceIn. A formación terá un enfoque práctico e próximo, resolvendo dúbidas e ofrecendo exemplos reais de como implementar os cambios necesarios nos sistemas de facturación.

Contidos das charlas formativas:
-Que é VeriFactu e en que consiste a nova normativa.
-A quen afecta e en que prazos: empresas (antes do 1 de xaneiro de 2026) e autónomos (antes do 1 de xullo de 2026).
-Como adaptar o punto de venda (TPV/POS) a tempo para cumprir coa normativa.
-Recomendacións para planificar a transición e evitar problemas de última hora. “VeriFactu é un cambio que vai afectar a todo o tecido comercial e hostaleiro. 

Datos da formación:
-Datas e hora: 22 e 23 de setembro de 2025, ás 10.00 horas.
-Duración: 1 hora.
-Lugar: 22 de setembro no coworking A Proa, no Milladoiro, e o 23 de setembro no salón de plenos do Concello de Ames, en Bertamiráns.
-Dirixido a comerciantes, hostaleiros, autónomos e xestorías locais.
-Inscrición gratuíta enviando un correo electrónico ao enderezo: promocioneconomica@concellodeames.gal.

PlaceIn, empresa situada no Milladoiro
PlaceIn é especialista en solucións de facturación, reservas, carta dixital, pedidos e pagos para hostalaría. As súas solucións son empregadas a diario por centos de miles de usuarios e traballan con máis de 2500 clientes en toda España, dende Coca-Cola Europacific Partners e Hijos de Rivera ata os Estrelas Michelín Lucía Freitas ou Yayo Daporta, e grupos de restauración como bulbiza, La Fábrica ou o Fogar do Santiso.