“Welcome to ma maison” é un falso documental, rodado a modo de making of, onde todo o que se nos mostra é 100% real. O filme retrata a Igor Fernández, un amante do cinema que inicia unha viaxe á cidade de Hollywood, Os Ánxeles, para coñecer ao director Nicolas Winding Refn, do que é un gran admirador.

Ao non atopar o rumbo, o filme entra de golpe no interior do seu protagonista, facendo difusa  a liña que separa a realidade e a ficción, o actor, a persoa e o propio personaxe. Deste xeito, experiméntase coa metanarración, construíndo ficción con imaxes reais, sentimentos sinceros e problemas verdadeiros.

O filme é unha produción de Gaitafilmes, en colaboración con Mordisco Films, e está dirixido por Andrés Goteira, que neste “Welcome to ma maison” ten a súa segunda película, despois de debutar con “Dhogs” en 2017, co que conseguiu 13 dos 17 premios aos que optaba nos Mestre Mateo 2017. Nesta ocasión, este proxecto estivo nominado a mellor montaxe e a mellor documental.

Ciclo Mestre Mateo
O Concello de Ames, a través da Concellaría de Cultura, é un dos cinco municipios da provincia da Coruña que forman parte do circuíto de cinema Ciclo Mestre Mateo, unha iniciativa conxunta da Academia Galega do Audiovisual e das catro deputacións para achegar os proxectos cinematográficos máis destacados de Galicia aos concellos e as vilas, aos que habitualmente non chegan as producións que participan nestes premios. Neste senso, o Ciclo Mestre Mateo colabora tamén coa Secretaría Xeral de Emigración para levar proxeccións ás comunidades galegas do exterior.

En total, e ao longo do 2022, o Ciclo Mestre Mateo presentará oito producións finalistas nas categorías de mellor documental e mellor longametraxe desta edición dos Premios Mestre Mateo, que se irán desvelando a principios de cada mes. Deste xeito, as películas que se poderán ver en Ames serán os documentais “A poeta analfabeta”, “A virxe roxa”, “O gran camiño” e “Welcome to ma maison”, ademais das películas “Cuñados”, “Jacinto”, “Malencolía” e “Tres”.