A Aula Rede de Centros para a Modernización e Inclusión Tecnolóxica da Xunta de Galicia, Rede CeMIT, do Concello de Ames iniciará 13 novos cursos nos meses de outubro e novembro. Esta aula formativa, situada na Casa da Cultura de Bertamiráns, ten como obxectivo facilitar o acceso dos veciños e veciñas de Ames aos diferentes cursos que oferta ao longo dos vindeiros meses, ademais de dispor dun horario de Aula Aberta para que os interesados e interesadas poidan pasar a rexistrarte nas actividades, solicitar axuda ou outra clase de información, e usar os ordenadores.

Para este mes de xaneiro hai programado un curso sobre o manexo do correo electrónico, o manexo da nube (para o cal xa están cubertas as prazas pero admítense inscricións na lista de agarda) e outro sobre como buscar na rede. Asemade, durante o mes de febreiro iniciarase un curso de mecanografía para adultos e outro sobre o manexo de aplicacións no móbil. Para saber máis sobre os días e horarios de cada un dos cursos podes consultar os anexos a esta nova.

Tamén se iniciará un novo ciclo de empregabilidade, con cursos de creación dun bo currículo e a busca de ofertas de emprego a través de Internet. O primeiro dos cursos, dedicado a creación do CV, será o martes 28 e mércores 29 de xaneiro de 18.00 a 20.00 horas. O segundo, que afondará na busca de emprego a través de Internet, será o 30 de xaneiro no mesmo horario.

Asemade, no 2020 continuarase cos cursos destinados a introducir a suite ofimática de LibreOffice. Desenvolveranse así, dous cursos, ambos no mes de febreiro, sobre o uso do procesador de textos LibreOffice Writer. O primeiro será dun nivel básico e o segundo realizará un maior afondamento.

Cursos para menores
Para os pequenos da casa hai programados un curso de presentacións para estudantes, no que se coñecerán programas como o PowerPoint e o Impress. Ademais a partir de febreiro desenvolveranse un curso de informática para nenas/os nivel básico e dous de mecanografía, un para menores de 10 anos e outro para os maiores desta idade.

Videoconferencias
O luns 13 de xaneiro, de 12.00 a 13.00 horas, levarase a cabo unha videoconferencia sobre talleres de reparación de vehículos, na que coñeceremos os nosos dereitos e deberes como persoas usuarios destes servizos así como unha serie de recomendacións a ter en conta.

Exames EMA
Os exames EMA son un tipo de exame presencial necesario para acadar o diploma en determinados cursos de teleformación do Espazo Multimedia de Aprendizaxe do CeMiT. Haberá dúas quendas, unha o 17 de xaneiro de 12.00 a 13.00 horas e outra o 14 de febreiro de 17.30 a 18.30 horas.

Tramitación das inscricións
Para obter máis información ou para reservar praza en calquera destas actividades, as persoas interesadas pódeno facer a través da páxina web da CeMIT, achegándose á aula da Casa da Cultura de Bertamiráns, chamando ao número de teléfono 682 373 753, ou enviando un correo ao enderezo electrónico cemit.ames@xunta.gal.