O Concello de Ames, a través da Concellaría de Obras e Servizos Básicos, continúa o seu investimento nas infraestruturas das parroquias e dos núcleos urbanos. Deste xeito, esta mañá o alcalde de Ames, Blas García, o concelleiro de Obras e Servizos Básicos, Gustavo  Nieto, e persoal da EPEL Augas de Ames, visitaron as obras de pavimentación que se están executando en tres rúas do núcleo urbano de Bertamiráns para comprobar a súa evolución. 

Ditos traballos estanse realizando nas rúas Rueiro, Telleira, e no treito inicial do camiño do Rueiro dende a avenida da Peregrina. Ademais, estase acometendo o acondicionamento do viario que vai dende A Condomiña ata Punxeiras, na parroquia de Ortoño. O proxecto foi adxudicado á empresa Cosmalca SL por un importe de 144.637 euros.

O alcalde, Blas García, explicou que “este proxecto forma parte do POS+ principal de 2025 no se inclúe a execución de seis proxectos por valor de 1.073.870 euros. Neste caso estase executando un proxecto que recolle actuacións en tres rúas do núcleo urbano de Bertamiráns e no viario que vai dende A Condomiña ata Punxeiras, na parroquia de Ortoño. Trátase de obras moi necesarias, xa que é tan importante facer obras novas, como realizar o mantemento e acondicionamento das rúas urbanas e dos camiños do rural xa existentes”.

Remodelación da rúa Telleira
Este proxecto recolle actuacións en catro rúas e camiños. A través da primeira actuación estase remodelando a rúa Telleira, no núcleo urbano de Bertamiráns. Para elo, estanse ampliando as beirarrúas, ata acadar un ancho de 2,00 metros, previa demolición das beirarrúas existentes e do firme do viario necesario. O pavimento previsto para as novas beirarrúas corresponderase con baldosa de formigón granallada de 60x40 centímetros.

A fin de mellorar a circulación dos vehículos e a ordenación das zonas de estacionamento nesta rúa, estase acometendo a reconversión nun viario de sentido único con carril de 3,00 metros de ancho e con zonas de aparcamento regulado.

Para o viario e as liñas de estacionamento prevese a execución dunha nova capa de rodaxe. Co obxecto de permitir a conexión peonil desta rúa co resto de beirarrúas existentes na contorna, prevese a execución dunha isleta peonil conformada por unha beirarrúa granallada, a implantación de dous pasos de peóns, un deles sobreelevado, e a adaptación das beirarrúas existentes.

Tamén se contempla a ampliación da liña de estacionamento de vehículos existente en Camiño Novo con pavimento de formigón. Finalmente, prevese a instalación de nova rede de iluminación pública coa colocación de luminarias e arquetas, así como a adaptación da rede de pluviais existente e a correspondente sinalización horizontal e vertical de toda a rúa.

Acondicionamento da rúa Rueiro
A segunda actuación proxectada ten por obxecto a mellora da capa de rodaxe da rúa Rueiro, tamén situada no núcleo urbano de Bertamiráns, naquelas zonas que se atopan máis deterioradas e a sinalización horizontal completa de toda a plataforma. Previo ao inicio das obras foi preciso a retirada dos redutores de velocidade existentes e proceder ao fresado dos treitos nos que se renovará a capa de rodaxe.

A nova capa de rodaxe estará composta por 5 centímetros de mestura bituminosa en quente, coa correspondente rega de adherencia. Tamén se contempla a sinalización horizontal completa da rúa e a instalación de 6 elementos para a redución da velocidade dos vehículos, así como a colocación de 4 sinais verticais.

Pavimentación do Camiño do Rueiro
A terceira actuación consiste na mellora da capa de rodaxe dun treito de 80 metros do Camiño do Rueiro, no núcleo urbano de Bertamiráns, dende a intersección coa avenida da Peregrina. Previamente procedeuse ao acondicionamento da explanación e á execución dunha capa de regularización de 5 centímetros de espesor medio de mestura bituminosa en quente naquelas zonas que se atopan máis deterioradas. A nova capa de rodaxe está composta por unha capa de 5 centímetros de mestura bituminosa en quente, coa correspondente rega de adherencia, en toda a plataforma. As actuacións complétanse coa sinalización horizontal e vertical do treito afectado.

Mellora do viario dende A Condomiña a Punxeiras
A cuarta e última actuación corresponde coa mellora do viario dende A Condomiña a Punxeiras. Nunha lonxitude de 225 metros de largo e 3 metros de ancho, así como 50 metros cadrados de sobreanchos e abanicos existentes, prevese a pavimentación do viario con 5 centímetros de mestura bituminosa en quente, coa correspondente rega de adherencia, previa reparación de fochancas e perfilado de mordentes con grava e tratamento asfáltico semiprofundo. Completan a actuación e limpeza de gabias e salvagabias, o pintado de sinalización horizontal e a renovación dun sinal de stop.

Novas relacionadas

El Correo Gallego: "El Ayuntamiento de Ames acomete obras en Bertamiráns y Ortoño con el POS+ 2025 para mejorar calles y caminos"