Este venres, día 25, volve á Ponte Maceira o programa Noites en Vela. Trátase dunha velada de música e cultura que nace da colaboración entre os Concellos de Ames e Negreira, e que ten como obxectivo poñer en valor a paraxe paisaxística e monumental da zona, declarada ben de interese cultural (BIC) e localización que forma parte dos pobos máis bonitos de España.

Nesta ocasión, amenizarán a noite as Pandereteiras de Costaneira e Tres Pesos. As Pandereteiras de Costaneira, que abrirán a súa actuación ás 20:30 horas, son un grupo tradicional procedente da parroquia de Bugallido.

Pola súa banda, Tres Pesos é unha banda conformada por Felisa Segade, Xoan Porto e Pepe de Calo. As tres voces, vinculadas a decenas de proxectos culturais como son Malveiras, Colexiata, Leilía, Brincadeira... fusionan a música e o folklore tradicional cun toque actual. Actuarán ás 21:00 horas. Ao remate da velada haberá fogos de artificio.

A actividade é de balde. Para coñecer máis información pódese contactar co Concello de Ames escribindo ao enderezo electrónico cultura@concellodeames.gal ou co de Negreira, escribindo a cultura.deportes@concellodenegreira.es.