Trátase de catro sesións distintas e independentes dirixidas a un público infantil a partir de 2 anos, nas que se recuperará a rúa e a natureza como espazo para o xogo, o lecer e a felicidade dos máis cativos e cativas, ao tempo que nos axudará a descubrir outras formas de brincar sen necesidade de mercar sofisticados aparellos. Xirarán en torno á música, ao xogo libre, aos xogos tradicionais e a obradoiros de creación libre de xoguetes con materiais naturais. Non é preciso inscrición previa e pódese participar nas catro sesións da actividade.

Cé Orquestra Pantasma, entre rimas, música e baile, iranos engaiolando cara a un mundo marabilloso: o mundo dos xogos e xoguetes miudiños. As Bricadeiras combinan un primeiro momento de música e baile seguido dun espazo de xogo libre con brinquedos tradicionais, materiais naturais e obradoiros de creación de xoguetes. Grandes e pequenos compartirán momentos máxicos, cantando, bailando, creando e xogando coa imaxinación como protagonista principal.

Haberá un espazo para brincar con material natural non estruturado e descubrir as múltiples posibilidades que nos ofrece a natureza (pólas, liscos de madeira, pedras, cana, patacas, landras, palla, follas…) e todo o beneficio que o seu emprego supón para os cativos e cativas. Ademais, nos obradoiros de creación libre de brinquedos, os e as participantes poderán realizar bonecos, vehículos… a partir de diferentes elementos naturais, como poliñas, bugallos, follas, noces, abelás, miga de pan, vimbios, carozos, cunchas, cana do país, follaco de espiga, teas, cortiza, cartón, fíos de lá, piñas, pataquiñas, castañas, casqueiro de piñeiro ou sobreira.

As xornadas pretenden fomentar a creatividade nos nenos e nenas apostando por unha crianza respectuosa e sostible e promovendo a socialización en lingua galega e o achegamento á natureza e ao xogo libre.