- Tematica
A partir do vindeiro luns, 4 de maio, estará aberto o prazo para que o alumnado da Escola Municipal de Música de Ames (EMMA) poida renovar a súa praza de cara ao vindeiro curso 2026-2027. A solicitude poderase realizar ata o luns 11 de maio, a través da Sede electrónica do Concello de Ames, ou ben de xeito presencial nas Oficinas de asistencia en materia de rexistro, situadas na Casa do Concello (Bertamiráns) e na Oficina municipal do Milladoiro. Premendo nesta ligazón podes descargar o impreso de solicitude de renovación de praza.
A Escola Municipal de Música de Ames (EMMA) abre dende o 4 ata o 11 de maio o prazo de renovación de matrícula de cara ao novo curso 2026-2027, dirixido ao alumnado que se atope cursando estudos na escola nestes momentos. Pola súa banda, as datas para a inscrición do alumnado de novo ingreso anunciaranse nos vindeiros días, sendo estas entre finais de maio ou comezos de xuño.
Desta maneira, todo o alumnado que non estea exento de pagamento de matrícula (véxanse as exencións no Artigo 7 da Ordenanza reguladora dos prezos públicos pola prestación dos servizos da Escola Municipal de Música de Ames) recibirá un correo electrónico dos Servizos de Recadación do Concello de Ames coa autoliquidación da taxa correspondente, e terá de prazo para o seu pagamento ata o 11 de maio.
Para a renovación da praza, as persoas interesadas deberán cubrir o impreso de solicitude e entregalo na Sede electrónica do Concello de Ames, dirixida á Concellaría de Cultura - Escola Municipal de Música de Ames; ou ben facelo de xeito presencial nas Oficinas de asistencia en materia de rexistro, situadas na Casa do Concello (Bertamiráns) e na Oficina municipal do Milladoiro.
O alumnado que por idade remata a materia de Música e Movemento, está citado o mércores día 20 de maio, ás 19.00 horas, na aula 7 das instalacións da EMMA, para realizar a adxudicación de prazas. Esta adxudicación será por sorteo, ao que será imprescindible asistir para elixir praza e horario.
Para obter máis información pódese contactar directamente coa EMMA a través do enderezo electrónico escolademusica@concellodeames.gal, ou ben a través do teléfono 981 535 940, en horario de 9.00 a 14.00 horas.
Concerto de fin de curso
As clases deste curso académico 2025-2026 finalizan na EMMA o vindeiro venres 19 de xuño. Como cada ano, e co obxectivo de festexar este fin das clases, o mércores 17 de xuño celebrarase o tradicional concerto de fin de curso coas actuacións dos alumnos e alumnas da escola, que mostrarán os coñecementos adquiridos durante todo o ano académico. O recital terá lugar no aparcadoiro da Casa da Cultura do Milladoiro.
