A xornada do sábado comezou con Tiago Blanco, que na súa terceira participación consecutiva nun Nacional asinou unha actuación moi notable en Kata. Tras gañar con autoridade o seu primeiro encontro, caeu nos cuartos de final nun axustado 3-2 contra Madrid. Na repesca polo bronce, un pequeno desequilibrio deixouno nunha meritoria sétima posición nacional. En Kumite, caeu na primeira rolda sen opción a repesca.

Pola súa banda, Jadel Rodríguez centrou os seus esforzos na modalidade de Kumite, na que era a súa segunda cita nacional consecutiva. Tras vencer con solvencia ao representante madrileño, caeu nas semifinais ante Valencia. Na loita polo bronce, a diferenza de experiencia e percorrido na categoría entre deportistas de primeiro e segundo ano acabou sendo determinante, pechando o campionato cunha quinta posición nacional que o consolida na elite da súa categoría.

O sábado pola tarde foi a quenda de Vera Quintás, que sumaba tamén a súa terceira participación consecutiva. En Kata realizou unha brillante execución inicial, pero no segundo encontro o panel arbitral non valorou un erro técnico da súa rival andaluza, o que a deixou fóra da competición cun 3-2 en contra. Este contratempo condicionou a modalidade de Kumite, onde non puido superar a primeira rolda. 

Tamén en Kumite feminino, Martina Barreiro regresou á convocatoria para o nacional tras non estar seleccionada o ano pasado. Malia caer no seu primeiro combate, amosou unha gran actitude e madurez, aproveitando a oportunidade para poñer en práctica o traballo acumulado durante as semanas de preparación.

A participación do club pechouse o domingo coa actuación de Xián Blanco. No que era o seu terceiro Campionato de España consecutivo, asinou un encontro moi serio contra Andalucía que finalmente se resolveu por un axustado 2-1 a favor do rival, sen opción posterior a repescar.

Desde a dirección da escola amesá salientan que “o feito de levar cinco deportistas que repiten convocatoria nacional ano tras ano, reflicte a solidez do traballo desenvolvido en Ames. Máis alá dos resultados, o club regresa a Galicia coa satisfacción de ver crecer a estes deportistas en cada cita nacional, confirmando que o proxecto Dokkodo segue a dar os seus froitos no panorama do karate español”..