Ana Balsa, como todas as persoas que participaron no concurso, fixo dúas fotos nas que aparecen dous dos elementos de iluminación de Nadal que este ano colocou o Concello en Bertamiráns e no Milladoiro. Ana elixiu o photocall da praza do Concello e o número 2021 da praza da Maía. As bases do concurso ofrecían as opcións de elixir dous motivos entre os catro propostos: o photocall, o 2021, a árbore de Nadal de 15 metros da praza de Manuel Murguía e a bola xigante que estaba situada na praza da Madalena, no Milladoiro.

A campaña “Ilumina o teu sorriso” está organizada polas tres asociacións de comerciantes e empresarios do municipio (Asociación de Pequenos Comerciantes Viorneira, Palmira, Bulebar; Asociación de Empresarios do Parque Empresarial do Milladoiro; e Asociación Xuntanza de Empresarios de Ames). Ademais, colaboran o Concello de Ames, o Centro Dental Macía e o estudo de fotografía Pixelin Photo.

É o segundo ano que se pon en marcha esta campaña que ten como intención fomentar e dinamizar o comercio local. “Este ano era máis importante que nunca realizar accións deste tipo que motivasen aos nosos veciños e nosas veciñas a facer as súas compras de Nadal no comercio local”, declara a concelleira de Promoción Económica, Ana Belén Paz. Paz agradece ás asociacións de comerciantes que se volvesen reunir para sacar adiante o concurso, a Xabier Macías por doar o teléfono e a sesión de spá para o premio e a todos os veciños e veciñas que se animaron a sacar fotografías para participar no concurso”.

Cómpre salientar que coas fotos máis orixinais que se presentaron ao concurso farase unha mostra nun local municipal. Da elección das fotografía e montaxe da exposición encargarase o estudo de fotografía Pixelin Photo.