As asociacións de veciños, comunidades de veciños/as e veciñanza en xeral xa teñen preparadas as festas que van realizar con motivo do San Xoán. Este ano houbo un gran número de peticións para realizar cacharelas, tanto nas zonas rurais do municipio coma na zona urbana. Deste xeito, o concello de Ames autorizou 244 solicitudes de cacharela/sardiñada. Está previsto que haxa 228 en parcelas privadas do rural e da zona urbana e 16 en espazos públicos.

Deste xeito, tramitáronse 11 solicitudes na parroquia de Agrón, 8 na Ameixenda, 51 en Ames, 32 en Biduído, 38 en Bugallido, 19 en Covas, 2 en Lens, 51 en Ortoño, 8 en Piñeiro, 1 en Tapia, e 7 en Trasmonte. Ademais, 16 realizaranse en espazos públicos de Bertamiráns, O Milladoiro, Coira, Adea Nova, Ventín, As Mimosas, parque empresarial do Milladoiro, campo da festa de Ortoño, Costoia, campo de fútbol de Framán e Piñeiro.    

O concelleiro de Urbanismo, Administración Xeral e Mobilidade, Víctor Fernández, destaca que “este ano achegámonos ás 250 solicitudes. O san Xoán é unha festa con grande arraigo no concello e Ames, así o indica o número de solicitudes feitas este ano. Trátase dunha noite que sempre se festexa. Este ano houbo un gran número de solicitudes e incrementouse un pouco respecto de anos anteriores, aínda que normalmente sempre se superan as 200 solicitudes”.

Unha vez obtido o permiso, os responsables da fogueira están na obriga de seguir as normas que publica o Concello. Unha delas refírese á cantidade de combustible da cacharela, que na zona urbana non pode exceder os 2 metros de diámetro, 6 metros de perímetro e 2 de altura. Na zona rural o volume de combustible non pode exceder de 3 metros de diámetro, 9 de perímetros e 3 de altura.

Normas para a realización de cacharelas
A separación entre as cacharelas, edificios, árbores, vehículos e mobiliario urbano serán como mínimo de 12 metros, agás no casco urbano. Poñerase especial coidado de non situalas debaixo de tendidos eléctricos ou telefónicos, así como de que nos arredores non exista ningún local no que se almacenen produtos inflamables, nin vehículos, nin preto de masas arbóreas ou zonas vexetais susceptibles de ser queimadas.

Por outra banda, o Concello prohibe queimar pneumáticos, plásticos, espumas de poliuretano, aceites, e en xeral calquera substancia que ao arder desprenda fume tóxico. En ningún caso se botarán ao lume recipientes que conteñan líquidos inflamables ou gases a presión (spray), aínda que estean baleiros.

No suposto de que a cacharela/sardiñada se faga sobre terreos de uso públicos enlousados, os organizadores encargaranse, pola súa conta, de protexer o pavimento cunha capa de area de 10 centímetros.

Será obrigatoria a limpeza do espazo autorizado ao remate da actividade, incluídos os elementos utilizados para o desenvolvemento do mesmo, inmediatamente despois de rematar a cacharela e/ou sardiñada. A hora límite para rematar a celebración é as 03:30 horas da madrugada, de acordo co disposto no artigo 5.f da Lei 10/2017 de 27 de decembro de espectáculos públicos e actividades recreativas de Galicia.

O concelleiro de Urbanismo, Administración Xeral e Mobilidade apela á responsabilidade da veciñanza “para cumprir as normas que se recollen no bando municipal aprobado ao respecto e tratar de desfrutar do San Xoán, pero sempre con prudencia e seguridade”.

Teléfonos de urxencia
Cómpre salientar asemade que os organizadores e organizadoras das cacharelas deben coidar os arredores e ter a man os seguintes números de teléfonos: Policía Local 619 767 575, Protección Civil de Ames 673 178 888 e Emerxencias 112.

A fogueira permanecerá vixiada polas persoas responsables ata a súa total extinción, que deberá ser asegurada empapando os restos con auga, e asegurándose de que as cinzas queden totalmente apagadas. No caso de que se levante o vento, e poida dificultarse a vixilancia e extinción da fogueira, esta deberá suspenderse.