Ao longo da tarde, o sarxento falará sobre as estafas e abusos que se dirixen aos maiores e ofrecerá unha serie de consellos para evitar caer neste tipo de accións. Asemade, tamén presentará información detallada sobre algúns dos roubos, estafas e timos máis comúns e poranse exemplos de como se desenvolven. Mediante esta actividade buscase  sensibilizar á poboación sobre algúns dos problemas cos que se encontran as persoas maiores e promover un trato correcto e xusto para con elas.

Durante o faladoiro ofreceranse tamén unha serie de consellos encamiñados a previr ou evitar caer neste tipo de situacións, entre elas a aplicación “AlertCops”, un servizo de alertas de seguridade cidadá deseñado polas forzas de seguridade estatais para facilitar a atención en situacións de risco. Os e as asistentes poderán expoñer as súas vivencias e consultar todas as dúbidas que lles xurdan. A entrada para acudir a esta sesión, que comezará ás 17.30h na Casa da Cultura de Bertamiráns, será libre e gratuíta ata completar aforo.

Promoción do trato adecuado e protección fronte ao maltrato

Este faladoiro, titulado Prevención de roubos, estafas e abusos en persoas maiores, está organizado pola Cruz Vermella ao abeiro do seu programa provincial Bo trato ás persoas maiores: promoción do trato adecuado e protección fronte ao maltrato. Esta iniciativa ten como obxectivo o de promover e sensibilizar á poboación, en especial ás persoas maiores de 65 anos, sobre o trato adecuado e o recoñecemento dos seus dereitos, para evitar que estes sexan vulnerados.

Asemade, mediante diversas accións, a organización busca apoiar e acompañar aos maiores que se atopan en situación e trato inadecuado ou maltrato para superar esa etapa a través de charlas, talleres, apoio psicosocial, mediación e/ou asesoramento; así como previr este tipo de situacións mediante a capacitación e empoderamento dos maiores.

Así, ao abeiro deste programa, tense previsto desenvolver unha segunda charla en Ames sobre a protección xurídica dos maiores. Titulada Pensa no teu futuro... decide ti, ofrecerase información sobre as medidas de protección xurídica que poden ser adoptadas con respecto ao futuro, como poden ser a tutela, curatela, testamento vital, autoinstrucións, garda de feito, patrimonio protexido ou hipoteca inversa, entre outros conceptos. O encargado de conducir este faladoiro, para o que aínda non hai unha data pechada, será un xuíz xubilado do Tribunal Contencioso-Administrativo da Coruña.