O Concello de Ames está inmerso no desenvolvemento das actuacións recollidas na EDUSI Impulsa Ames. Un dos proxectos que se está executando é o programa Ames Emprega e Integra, que está dirixido a colectivos desfavorecidos do concello de Ames. Un dos ámbitos prioritarios de intervención do Concello de Ames é poñer en marcha actuacións en materia de prevención, detección e intervención da exclusión social.

Neste senso, o Concello de Ames puxo en marcha un programa de inserción laboral que responde ás actuais demandas sociais de dar cobertura a unha oferta formativa que incremente o índice de inserción laboral e social no municipio, como requisito imprescindible para poder fixar poboación no mesmo, axustándose aos intereses e necesidades dos colectivos ao que se dirixe e fomentando a cohesión social, a loita efectiva contra a discriminación e a erradicación da pobreza.

Formación ocupacional
Para dar a coñecer a formación ocupacional que se vai impartir dende o 3 de xullo ata o mes de novembro, vaise a realizar unha sesión informativa mañá, 29 de xuño, ás 16.30 horas, no Espazo coworking A Proa, no Milladoiro. A sesión correrá a cargo da encargada da empresa Rafer e dos docentes da parte sectorial. Despois farase unha visita ás instalacións de ForGa, situadas no parque empresarial do Milladoiro, onde se vai a impartir a formación. Para participar nesta xornada hai que inscribirse cubrindo este formulario.

A formación ocupacional comeza o luns, 3 de xullo, con un curso de prevención de riscos laborais. Ademais, ata o vindeiro mes de novembro impartirase formación sobre prevención de riscos laborais de albanelería; restaurante e bares; auxiliar de cociña; manipulador de alimentos; limpeza; camareiro/a de pisos; recepción e atención ao cliente en aloxamentos; dependente de comercio; almacén; comercial; empregado/a doméstico/a; fotovoltaica e térmica.

Por outra banda, estanse impartindo outras actividades formativas máis curtas de duración. Deste xeito, o venres 30 de xuño, de 9:00 a 14:00 horas, impártese un curso de preparación de entrevistas de traballo, na sala Maruxía do Espazo A Proa. Ademais, o luns 3 de xullo, de 9:00 a 12:30 horas, no Espazo A Proa, no Milladoiro, impartirase o curso de habilidades sociais “Que transmitimos aos demais?; e o mércores 5 de xullo, e 9.00 a 14.00 horas, realízase no Pazo da Peregrina, en Bertamiráns, o curso “Uso do smartphone para a mellora da calidade da vida”.

Cal é o obxectivo do programa?
O obxectivo de dita iniciativa é a inserción laboral das persoas participantes ou a mellora da sua empregabilidade. Lévase a cabo mediante a execución dun programa de inserción laboral derivado dun estudio realizado previamente que determinou os colectivos desfavorecidos e as súas demandas específicas de formación, acompañamento e practica laboral.

O programa está dirixido prioritariamente a persoas mozas (menores de 30 anos), con particular atención a aqueles con déficit de formación, mulleres, parados de longa duración, maiores de 45 anos, persoas con responsabilidades familiares non compartidas, persoas con discapacidade, persoas en situación de exclusión social e persoas inmigrantes. Para participar é necesario residir no concello de Ames, ser demandante de emprego e estar nunha situación de busca activa de emprego.

O programa ten como ámbito territorial a totalidade do concello de Ames, priorizando os núcleos poboacionais do Milladoiro e de Bertamiráns como eixos presenciais do programa. As actividades do programa comezaron coa captación de participantes ao longo do mes de maio e desenvolverase ata novembro deste ano.

Procedemento para inscribirse
As inscricións pódense realizar chamando ao número de teléfono 674 594 843, enviando un correo electrónico ao enderezo ames.integra.emprega@gmail.com ou a través da páxina web de Ames Integra e Emprega.

A estratexia proposta co programa de inserción laboral de colectivos desfavorecidos no concello de Ames pon o foco de atención na necesidade de dotar ás persoas, especialmente poboación feminina e inmigrante, mocidade sen cualificación, e parados de longa duración en situación de desemprego, en procura de primeiro emprego ou en procesos de mellora de emprego, das competencias transversais/horizontais e competencias profesionais necesarias para poder consolidarse no mercado laboral, atendendo ás competencias en materia de tecnoloxías da información e comunicación.

Esta actuación está cofinanciada pola Unión Europea a través do Fondo de Desenvolvemento Rexional (FEDER) cunha taxa de cofinanciamento do 80% dentro do Programa Operativo FEDER de Crecemento Sostible 2014/2020, enmarcado dentro da Estratexia de Desenvolvemento Urbano Sostible Impulsa Ames, de conformidade coa Resolución do 21 de xullo de 2017, da Secretaria de Estado de Orzamentos e Gastos, pola que se resolve a concesión definitiva de axudas da segunda convocatoria para a selección de estratexias de desenvolvemento urbano sostible e integrado.