Solapas principales

Contacontos, obradoiros e encontros literarios no programa de animación á lectura do último trimestre de 2021

Viernes, 01 de octubre de 2021

Contacontos para nenos e nenas de 3 a 8 anos, obradoiros dirixidos aos rapaces e ás rapazas de 3ºa  6º de primaria e encontros literarios para público adulto conforman o Programa de Animación á lectura que as bibliotecas de Ames preparan para o últimos trimestre do ano 2021. Como novidade, a información completa do programa pódese obter escaneando o código QR desde o cartaz que anuncia as actividades. Para todas as actividades é necesaria inscrición previa que se pode tramitar chamando por teléfono aos números 981 53 08 07 , 981 88 48 29 ou a través do enderezo electrónico biblioteca@concellodeames.gal. Podes consultar aquí a programación completa do trimestre.

Gañar lectores e lectoras novas e afianzar o gusto pola lectura entre as persoas que xa len, é o obxectivo do Programa que as bibliotecas de Ames desenvolven decotío. Para este último trimestre do ano os/as responsables do programa preparan contacontos, obradoiros e encontros literarios para adultos.
Para a concelleira de Cultura, Natividade González, “o programa está un ano mais pensado para estimular e incentivar o pracer da lectura aos máis pequenos e pequenas da casa. O atractivo dos primeiros contacontos está presente na idea e e por fin algúns poderán achegarse por primeira vez aos espazos da biblioteca, xa que temos novos aforos para maior número de persoas”.

Mes de outubro
Con “Monstros, lobos e outros” as bibliotecas de Ames inauguran as actividades de animación á lectura previstas para este trimestre. Este contacontos, dirixido a nenos e nenas de entre 3 e 6 anos, realizarase o martes, 5, o mércores, 6, e xoves, 7 de outubro na biblioteca do Milladoiro ás 17:30 horas. As inscricións están abertas desde o 27 de setembro ao 2 de outubro. As sesión repetirase na biblioteca de Bertamiráns o martes 19, o mércores 20 e o xoves, 21 á mesma hora. Neste caso o período de inscrición abrangue desde 11 ao 16 de outubro.

A rapazada de entre 3º e 6º de primaria terá a súa primeira cita coas actividades de animación á lectura o 24 de outubro, Día da Biblioteca, a través dun obradoiro que leva por título “Aloute Macchine” e que achegará aos mozos e mozas os segredos da imprenta. A través do xogo, os/as asistentes aprenderán como se facían os libros antano e poderán levar para casa unha mostra do traballo realizado no obradoiro con prensas de impresión antiga, rolos, tinta e papeis. O obradoiro desenvolverase o sábado 23 ás 11:00 horas na biblioteca de Bertamiráns e o venres, 29, ás 17:30 na do Milladoiro. O prazo para inscribirte está aberto desde o día 11 até o día 20 de outubro.

Mes de novembro
Coma gatos e tratos” é o contacontos co que comeza a actividade das bibliotecas no mes de novembro. Está dirixido a nenos e nenas de entre 3 e 8 anos. Desenvolverase na biblioteca do Milladoiro o martes 2, o mércores 3 e o xoves, 4 de novembro ás 17:30 horas. Hai que inscribirse entre o 25 e o 30 de outubro. O obradoiro repítese na Casa de Cultura de Beertamiráns o 16,17 e 18 de novembro; neste caso o prazo de inscrición esténdese desde o 8 ao 13 de novembro.

Coincidindo co mes da ciencia en galego nas bibliotecas, ofrecerase á mocidade de Ames o obradoiro “Excelentes mulleres científicas”. Está dirixido a rapaces e rapazas de 3º a 6º de primaria. O obradoiro dará coñecer ás figuras de Begoña Vila e Hipatia de Alexandrí. A base de experimentos comprobarase o que ela e outras mulleres aportaron á ciencia. O obradoiro desenvolverase o venres, 19 de novembro, ás 17:30 horas. Na biblioteca do Milladoiro e o sábado, 20, ás 11:00 horas na de Bertamiráns. As inscricións poden facerse entre p 8 e o 17 de novembro.

Mes de decembro
O contacontos do mes de decembro titúlase “Bruxas, xigantes e galiñas”. Faranse, como nos meses anteriores, seis sesións. En Milladoiro terá lugar o martes 30 de novembro, o mércores 1 de decembro e o xoves, 2 de decembro ás 17:30 horas. O prazo para inscribirse nestas sesións de Milladoiro esténdese desde o 22 ao 27 de novembro. En Bertamiráns, a actividade desenvolverase o martes 14, o xoves 15 e o venres, 16 de decembro ás 17:30. O prazo de inscrición vai do 1 ao 11 de decembro.

O obradoiro que o programa de animación á lectura ofrecerá no mes de decembro é un clásico no programa de animación á lectura. “Decora o teu Nadal” é o seu título e está dirixido a nenos e nenas de 3º a 6º de primaria. Desenvolverase o mércores 22 de decembro ás 11:30 na biblioteca do Milladoiro e o xoves, 23 ás 11:30 na de Bertamiráns. Para ámbalas dúas sesións, o prazo está aberto desde o 9 até o 18 de decembro.

As bibliotecas de Ames preparan tamén para os meses de outubro, novembro e decembro un programa de encontros literarios para adultos que en breve se dará a coñecer.

 

cartaz

Multimedia

  • Cartaz