Neste pasado mes de agosto, a Aula AmTIC do Milladoiro acolleu un Campamento Dixital dirixido á mocidade durante o mes de agosto e a primeira semana de setembro para que, neste período non lectivo, continuaran a aprender e adquirir competencias, neste caso no ámbito dixital. 

Campamento Dixital é unha iniciativa gratuíta impulsada pola Fundación Cibervoluntarios, dentro do Programa de Competencias Dixitais para a Infancia, CODI, posto en marcha polo Ministerio de Xuventude e Infancia e financiado pola Unión Europea–Next Generation EU.

Deste xeito, no Campamento Dixital que se desenvolveu en Ames, participaron un total de 56 mozos e mozas de entre 9 e 14 anos. O programa impartiuse de luns a venres en horario de mañá e en cinco quendas, correspondentes a cada semana do mes de agosto e a primeira do mes de setembro. Así mesmo, ao finalizar o campamento, a rapazada recibiu un certificado que avala as competencias adquiridas. 

Nas sesións do campamento, os participantes puideron adquirir diferentes ferramentas e competencias dentro do ámbito dixital a través de xogos, retos creativos e traballo en equipo. Coa realización deste programa, a mocidade aprende a ter un contacto positivo e saudable da tecnoloxía, impulsando un uso práctico, creativo e lúdico para o seu desenvolvemento cognitivo. 

Sobre ‘Campamento Dixital’ de Cibervoluntarios
Campamento Dixital responde á necesidade de que a infancia e a mocidade conten coas ferramentas axeitadas para desenvolverse nun mundo cada vez máis dixitalizado. O obxectivo é formar no uso seguro e responsable da tecnoloxía, potenciar o talento dixital e fomentar o pensamento crítico entre os máis novos, con especial atención a aqueles nunha situación de maior vulnerabilidade dixital.

Esta actividade non só ensina a usar a tecnoloxía, tamén a comprendela e aproveitala como ferramenta para o desenvolvemento persoal e profesional. Grazas ao apoio dos concellos, centros educativos e entidades locais, este programa organízase en espazos accesibles e seguros, promovendo unha educación dixital próxima.

O programa organízase en diferentes grupos de idade e todos os contidos están deseñados para adaptarse ás súas necesidades e capacidades. Os máis pequenos, entre 9 e 11 anos, convértense en “detectives dixitais” que aprenden a identificar noticias falsas, protexer a súa identidade en internet e crear contidos como presentacións ou vídeos. Na franxa de 12 a 14 anos, afondan no uso consciente da tecnoloxía, a convivencia dixital e o coidado e importancia da privacidade nas redes sociais.

Ao rematar, todos os participantes reciben o certificado oficial DigComp, que acredita as súas competencias dixitais segundo o marco europeo, achegando un valor diferencial á súa formación académica e profesional. 

Novas relacionadas: 

El Correo Gallego: "O Campamento Dixital do Milladoiro contou con case 60 nenos"

Diario de Santiago: "Case 60 nenos e nenas participaron no Campamento Dixital que acolleu a Aula AmTIC do Milladoiro durante o mes de agosto"