A noite deste venres, 21 de xuño, a Casa do Concello de Ames iluminarase de verde para mostrar o seu apoio ás persoas enfermas de Esclerose Lateral Amiotrófica (ELA), concienciar á sociedade sobre as dificultades que tanto os pacientes como as familias deben afrontar na súa vida diaria, e visibilizar esta enfermidade neuromuscular. Así, o concello amesá, mediante a Concellaría de Benestar Social, únese á iniciativa #LuzporlaELA, impulsada pola  Fundación Luzón e as Asociacións de Familiares e Pacientes de ELA de España como a Asociación Galega de Afectados de Esclerose Lateral Amiotrófica (AGAELA).
 
Asemade, dende a Concellaría de Benestar Social anímase a toda a veciñanza a fotografarse con algún dos 192 monumentos e edificios que este ano se iluminarán de verde co gallo deste día, e difundir as instantáneas nas súas redes sociais co hastag #LuzporlaELA, #UnidoscontralaELA ou #DiaMundialdelaELA.
 
Esta iniciativa foi posta en marcha o pasado ano, ao abeiro da que se iluminaron un total de 168 monumentos e edificios de 132 municipios españois. Nesta ocasión, xa hai confirmada a iluminación de 192 monumentos, entre os que se atopan a Torre de Hércules ou a Ponte Romana de Ourense. Poden consultarse os edificios que participan nesta iniciativa na seguinte ligazón: https://luzporlaela.es/luz-por-la-ela.html.

O obxectivo deste ano é o de incrementar o número de persoas que coñecen esta enfermidade e ofrecerlles información sobre a mesma. Así, búscase concienciar e poñer de manifesto a vontade de impulsar actividades solidarias en favor de persoas enfermas como as que padecen ELA. A Esclerose Lateral Amiotrófica é unha enfermidade neuromuscular dexenerativa que provoca atrofia muscular e a parálise progresiva de case todos os músculos do corpo. Así, as persoas afectadas pola ELA perden a capacidade de falar, sorrir, moverse, comer e mesmo respirar de forma autónoma, mantendo intacta funcións como a sensibilidade, a intelixencia ou o movemento ocular.

A páxina web do #LuzporlaELA (https://luzporlaela.es/que-es-la-ela.html) recolle que en España, de media, son diagnosticados tres novos casos de ELA ao día, o que suma uns 1.000 casos ao ano. Na actualidade, o número de persoas afectadas por esta enfermidade a nivel nacional ronda as 4.000. Asemade, a Asociación Española de ELA sinala que entre o 90% e o 95% dos casos de ELA preséntanse de forma esporádica e sen orixe coñecido, mentres que só entre o 5% e o 10% restante son casos de ELA familiar, nos que existe un compoñente hereditario.