A realización desta xornada sobre mobilidade busca reflexionar e contrastar propostas concretas sobre experiencias vinculadas á mobilidade urbana e á conectividade entre diferentes núcleos de poboación metropolitanos, como é o caso do concello de Ames. A mobilidade sustentable é un dos obxectivos temáticos das estratexias de desenvolvemento urbano de toda Europa, e en Galicia, pola elevada dispersión dos núcleos de poboación, cobra unha especial relevancia. Esta iniciativa de comunicación enmárcase dentro da EDUSI Impulsa Ames, cofinanciada mediante o Programa Operativo FEDER de Crecemento Sustentable 2014-2020.

Esta xornada de traballo está dirixida, en primeiro lugar, á cidadanía do municipio de Ames, que forma parte da necesaria dinamización e participación social na procura de solucións eficientes e eficaces. En segundo lugar, a xornada está aberta á participación de técnicos urbanísticos, profesionais da mobilidade e arquitectos, así como a calquera persoa interesada na temática que se vai tratar. Esta xornada desenvolverase mañá, 25 de abril, na Casa da Cultura do Milladoiro. Para inscribirse hai que enviar un correo electrónico ao enderezo jornada.movilidad@ames2020.gal. Aínda quedan prazas dispoñibles xa que o aforo non está completo.

A devandita xornada comezará ás 10:00 horas. Primeiro farase un breve acto de inauguración, e de seguido, haberá unha mesa institucional para falar da mobilidade no sistema urbano galego, na que participará José Miñones, alcalde de Ames; Valentín González Formoso, presidente da Deputación da Coruña; José Blanco, membro do Parlamento Europeo; e Alfonso Gil Invernón, vicepresidente da Comisión de transportes e infraestruturas da Federación Española de Municipios e Provincias (FEMP). Ás 11:15h realizarase un relatorio sobre a mobilidade en trasporte público en áreas metropolitanas, no que intervirán Julián Sastre, presidente do Instituto de la Movilidad; e Rosa Arce, directora do Centro de Investigación del Transporte (TRANSyT).

Mobilidade na área metropolitana de Santiago
Ás 12:45 horas desenvolverase unha mesa redonda sobre a mobilidade na área metropolitana de Santiago. Neste mesa tamén se abordarán os problemas de mobilidade na área de Compostela, así como a experiencia en cada un dos municipios. Intervirán o alcalde de Ames, José Miñones; o concelleiro de Mobilidade do Concello de Santiago de Compostela, Jorge Duarte; a concelleira de Transporte do Concello de Teo, Concepción García; o alcalde do Concello de Oroso, Manuel Mirás; e mailo alcalde do Concello de Brión, José Luís García.

Pola tarde, ás 17:00 horas, haberá outra mesa redonda. Neste caso abordarase a mobilidade urbana sustentable, os retos e os desafíos. O moderador será Esteban López, experto en mobilidade. Participarán Xavier Pont, coordinador de proxectos da Área de Urbanismo e Mobilidade da Axencia de Ecología Urbana de Barcelona; David Álvarez, consultor de Afora Tráfico y Transporte; e Manuel Márquez, xefe do Servizo de Planificación e Explotación da Dirección Xeral de Mobilidade da Junta de Andalucía.

A mellora da mobilidade e conectividade será un dos investimentos de maior calado cun plan de transporte público entre O Milladoiro e Bertamiráns complementado con transporte baixo demanda. A xornada que se vai realizar mañá enmárcase no traballo que hai que realizar neste eido que é un dos catro grandes obxectivos incluídos na Estratexia DUSI Impulsa Ames.

Contido relacionado:

El Correo Gallego: "Mobilidade amesá a debate con políticos e urbanistas, hoxe"
Compostela 24 horas: "La Casa da Cultura del Milladoiro, sede de una jornada sobre movilidad sostenible en estrategias urbanas integradas"