O departamento de Bibliotecas amesán retoma as actividades para as nenas e nenos de 3º a 6º de primaria, unha vez que xa volveron tamén as actividades para crianzas dos 3 aos 8 anos. Nesta ocasión, a rapazada poderá gozar dun obradoiro no que se traballará coa obra de Rosalía de Castro a través da impresión de camisetas.

O taller desenvolverase de maneira dual nas bibliotecas do Milladoiro e de Bertamiráns. No centro do Milladoiro terá lugar o venres 25, ás 17:30 horas, mentres que a biblioteca de Bertamiráns acollerá o obradoiro o seguinte día pola mañá, o sábado 26 ás 11:30 horas.

Para reservar praza nestas sesións de animación á lectura, cun aforo limitado ás 15 prazas, cómpre poñerse en contacto co Departamento de Bibliotecas de Ames, a través do enderezo electrónico biblioteca@concellodeames.gal. Por outra banda, pódese solicitar a inscrición falando directamente coa biblioteca á que se desexe asistir: para a biblioteca do Milladoiro, consultando no 981 53 08 07, mentres que para a de Bertamiráns, chamando ao 981 88 48 29. O prazo de inscrición abre este luns 14 e rematará o mércores 23 de febreiro.

Abren as inscricións para Bertamiráns de “1 ovelliña, 2 ovelliñas, 3 ovelliñas...”

Dende este mesmo luns 14 ata o sábado 19 de febreiro, e despois do seu paso pola biblioteca do Milladoiro, están abertas as inscricións para a sesión de contos “1 ovelliña, 2 ovelliñas, 3 ovelliñas...” en Bertamiráns. A proposta de narrativa oral, dirixida a nenos e nenas dos 3 aos 8 anos, terá lugar os días 22, 23 e 24 de febreiro, sempre ás 17:30 horas. Para anotarse, cómpre chamar ao 981 88 48 29, ou ben enviar un correo a biblioteca@concellodeames.gal.