A Casa da Cultura de Bertamiráns acolle este venres, 22 de maio, dende as 20.00 horas, un concerto de acordeón amenizado polos alumnos e alumnas da escola Alborada. Deste xeito, arredor de 50 acordeonistas de todas as idades procedentes de Meixonfrío, Teo, Ordes, Santa Comba, Cerceda, Val do Dubra e Ames deleitarán ao público con todo o aprendido durante este curso académico, nunha das moitas actuacións que realizan durante todo o ano. A entrada é libre e gratuíta.
O alumnado da escola de acordeón Alborada estará o vindeiro venres, 22 de maio, a partir das 20.00 horas, na Casa da Cultura de Bertamiráns ofrecendo ao público os coñecementos musicais adquiridos durante todo este curso académico. Deste xeito, acordeonistas de Meixonfrío, Teo, Ordes, Santa Comba, Cerceda, Val do Dubra e Bertamiráns ateigarán o auditorio.
Estes músicos, que teñen entre 10 e 80 anos, aínda que practicamente a súa totalidade supera os 60 anos de idade, aprenderon a tocar este instrumento dende cero a partir dun método específico e especializado orientado a todas as persoas que non teñen coñecementos nin nocións previas de linguaxe musical.
A través da escola Alborada, o alumnado de acordeón aprende a tocar este instrumento tan característico da música popular do país á vez que recorre a xeografía galega demostrando os coñecementos adquiridos nas aulas. Este ano, xa visitaron Cerceda no mes de marzo e Santa Comba a pasada fin de semana. A entrada para este concerto é de balde.
Clases en Bertamiráns
Dende hai arredor de tres meses, a escola Alborada, impulsada a través dun establecemento comercial do Val do Dubra que recibe o mesmo nome, imparte clases para todas as idades en Bertamiráns. Ditas aulas aínda teñen prazas dispoñibles. Todas aquelas persoas interesadas en participar e aprender a tocar este instrumento, poden solicitar máis información no número de teléfono 667 374 409.
Novas relacionadas
Diario de Santiago: "Bertamiráns acolle este venres o concerto de acordeón da escola Alborada"
