A Aula da Rede de Centros para a Modernización e Inclusión Tecnolóxica da Xunta de Galicia, Rede CeMIT, do Concello de Ames, prosigue co curso de Ofimática, aprendendo a crear presentacións con LibreOffice Impress.  Asemade, co novo mes darán comezo outras xornadas como un curso básico para o manexo de teléfonos móbiles. As prazas para ambos xa se encontran cubertas, pero existe a posibilidade de apuntarse na lista de agarda.

Xa na segunda quincena do mes de novembro terán lugar as xornadas “Crea o teu blog!”. O curso centrarase na plataforma Blogger e a importancia do blog como medio de comunicación básico que nos libera da dependencia das redes sociais á hora de comunicarnos co noso público. Para consultar días e horarios para esta e as seguintes actividades de novembro pódese premer nesta ligazón.  

Ciclos de empregabilidade
Tamén se desenvolverán en novembro dous ciclos de empregabilidade. “Crea o teu CV!” e “Busca de emprego a través de Internet” , que se centrarán na mellora do proceso de busca de emprego mediante a creación dun currículo adaptado ás necesidades, así como no desenvolvemento de habilidades de busca de emprego a través da rede.

Xornadas do mes de decembro
No último mes do ano, desenvolveranse xornadas de edición de imaxes co programa GIMP, para entender as súas bases e comezar a desenvolver técnicas de photoshop. Ademais, con motivo da proximidade das festas de Nadal, terá lugar un curso sobre como realizar compras seguras a través de Internet.

E seguindo coas posibilidades que nos ofrece a rede, o martes 10, mércores 11 e xoves 12 teremos a posibilidade de afondar na administración electrónica, rompendo as barreiras que existen para converternos en verdadeiros cidadáns dixitais.

Cursos enfocados aos máis pequenos
Durante o mes de decembro tamén dará comezo un curso de informática de nivel medio para os máis pequenos.  Desta maneira  os rapaces e rapazas  afondarán no manexo do correo electrónico e ferramentas básicas para os estudantes coma Wikipedia, Calendario ou Google Drive. Será dende o 3 ao 19 de decembro.

Videoconferencias
A Aula CeMIT ofrece a posibilidade de presenciar videoconferencias con distintos departamentos pra ofrecer charlas sobre temas relacionados coa tecnoloxía ou os dereitos do consumidor. A do mes de novembro será o luns 4, de 12.00 a 13.00 horas, ofrecida pola Escola Galega de Consumo. Estará centrada no servizo técnico de asistencia que se ofrecen nos seguros de fogar e os propios de aparellos como caldeiras ou lavadoras.

Exames EMA
Os exames EMA son un tipo de exame presencial necesario para acadar o diploma en determinados cursos de teleformación do Espazo Multimedia de Aprendizaxe do CeMIT. Son exames que non se deben confundir cos do CODIX.
Para o mes de novembro hai a convocatoria do día 22 de 12.00 a 13.00 horas, mentres que para decembro, o día 13 de 17.30 a 18.30 horas.

Para a reserva de praza en calquera das actividades mencionadas pódese acceder á páxina web do CeMIT,  de maneira presencial no primeiro andar da Casa da Cultura de Bertamiráns, chamando por teléfono ó 682 373 753 ou a través do correo electrónico cemit.ames@xuta.gal.