O coordinador de Alcer Coruña, Alfredo Saborido, destacou que estas xornadas “son un espazo de encontro e de formación para as persoas con enfermidades renais e as súas familias”. Alfredo Saborido incidiu na importancia destes encontros, xa que “unha poboación como a nosa ten que ter coñecemento para poder tomar decisións sobre a nosa vida”, nun contexto no que se espera que “a enfermidade renal crónica se converta nunha das principais causas de morte en España”.

O evento arrincará ás 10.00 horas da mañá cunha inauguración na que participará unha delegación do Concello de Ames formada polo alcalde, Blas García, a primeira tenente de alcalde e concelleira de Promoción da Saúde, Susana Señorís, e a concelleira de Benestar Social, Igualdade e Voluntariado, Uxía García. Tamén intervirán na apertura o director xeral de Familia, Inferencia e Dinamización Demográfica, Jacobo Rey Sastre, o presidente da Sociedade Galega de Nefroloxía, Jesús Calviño, e o presidente de Alcer Galicia, Rafael González.

Relatorios de interese
Posteriormente sucederanse durante toda a mañá, ata as 14.00 horas, relatorios de distintos ámbitos da materia principal. Ás 10.30 horas dará comezo a temática “A miña decisión, o meu dereito: ética, testamento vital e morte digna”, coa participación da vogal do Comité de Ética Asistencial da Área Sanitaria de Ourense, María Xosé Vázquez, e a presidenta da Asociación Dereito a Morrer Dignamente de Galicia, Isabel Blanco.

Ás 11.30 horas será a quenda do bloque “Enfermidades renais raras”, coa intervención do xefe de laboratorios NefreoCHUS e NefreoHULA, Miguel A. García. Ás 12.00 horas haberá unha pausa para o café e ás 12.30 arrincará a segunda parte das xornadas coa temática “A futuro”, co relatorio do presidente da Federación Nacional Alcer, Daniel Gallego.

A partir das 13.00 horas o presidente de Alcer Galicia, Rafael Rodríguez, e o director de procesos de soporte da Área Sanitaria de Santiago e Barbanza, Jorge Aboal, intervirán na temática “A implicación na prevención primaria da enfermidade renal”. Para rematar, ás 13.30 horas, a psicóloga de Alcer Galicia, Lorena García, afondará nas “Técnicas de diálise domiciliaria”, acompañada de dúas persoas que empregan esta técnica como son Yolanda Paz e Javier García.

Para poder participar é necesario inscribirse, xa sexa mediante o correo electrónico da Federación alcergalicia@gmail.com ou ben a través dos números de teléfono 981 298 759 / 619 609 797 / 988 229 615 / 693 714 005. Co fin de fomentar a participación, Alcer achega autobuses gratuítos dende todas as cidades galegas para os e as asistentes. De seguido, tras unha longa mañá de intercambio de información, as xornadas rematarán cun popular xantar de Nadal no Restaurante San Martiño, en Teo.

Concerto de góspel
No acto tamén se presentou o concerto de góspel pola doazón de órganos. Esta iniciativa, levada a cabo pola Asociación Alcer Coruña e en colaboración co Concello de Ames e o Coro Góspel Vida, busca sensibilizar á veciñanza de Ames sobre a importancia de doar órganos para salvar as vidas das persoas que agardan un transplante.

A concelleira de Benestar Social, Igualdade e Voluntariado, Uxía García, indicou que este concerto é “algo novo no noso Concello” e que “vai sorprender”. A concelleira quixo recordar tamén que Ames “é un Concello solidario e vai dar unha moi boa resposta”. Por último, quixo agradecer a predisposición de Alcer para escoller Ames como localización para realizar o evento: “Sempre que poidamos, aí estaremos”, indicou.

O concerto celebrarase o próximo sábado 29 de novembro, ás 20.00 horas, no auditorio da Casa da Cultura de Bertamiráns da man do Coro Góspel Vida. A entrada ten un custo de 10€ e pódese mercar nas tendas Secretos de tocador, en Bertamiráns, e Libraría Nenos Nais, no Milladoiro.

Novas relacionadas:

El Correo Gallego: "Alcer Galicia reúne en Ames a personas con enfermedades renales"