O grupo saíu de Ames arredor das 16:00 horas, e chegou ao Val de Laciana cara ao final do día. Tras cear e recoller o material de esquí, os participantes da excursión tiveron a oportunidade de realizar unha saída pola vila.

Tras unha noite de descanso, as actividades deron comezo ás 8:00 horas do sábado. Os mozos e mozas gozaron de dúas horas de clases de esquí, e posteriormente puideron realizar a actividade por libre. Pola tarde, os excursionistas coñeceron Villablino, o núcleo principal da comarca, cualificada como Reserva da Biosfera dende o ano 2003. Alí realizaron unha xincana xunto aos seus monitores.

Xa na mañá do domingo 12, a rapazada volveu participar nunha nova sesión formativa de esquí, así como de máis tempo libre nas pistas de Leitariegos, antes de entregar o material e subir ao autobús para poñer fin á viaxe de tres días. O grupo regresou a Ames arredor das 20:00 horas.

Na fin de semana nas pistas da estación invernal participaron 40 mozos e mozas, que formaron un grupo diverso, con idades entre os 15 e os 28 anos, aproximadamente. A Concellería de Xuventude, que puxo en marcha un ano máis esta iniciativa, buscou fomentar as relacións persoais entre os rapaces e rapazas do concello apostando polo ocio saudable, o deporte e o contacto coa natureza.

Novas relacionadas:

El Correo Gallego: "Corenta rapaces amesáns sumáronse á 'Finde na neve' na estación de Leitariegos"