[17-11-2018] No pasado mes de outubro comezou un novo curso das Escolas deportivas municipais con récord de inscritos superando os 2.700 dos que 2.017 acadaron praza nalgunha das 20 actividades ofertadas. O número total de usuarios/as en lista de agarda será de 657, sendo as actividades de nova creación, Ioga e GAP, xunto co Pilates, as actividades mais demandadas. Moitos/as destes/as usuarios fóronse dando de alta ao longo do pasado mes despois de que quedasen algúns prazas baleiras en diferentes grupos. Para este curso ofértanse un total de 2.423 prazas. Este ano destaca a inclusión de catro novas actividades como son o squash (dentro do apartado de Formación deportiva) e as clases de adestramento funcional; ioga e GAP (hipoprensivos) – Aerocombat (dentro do programa de Ponte en forma). Asemade, as clases xa están sendo impartidas nos novos anexos que se executaron nos pavillóns polideportivos do Milladoiro e Bertamiráns.

[16-11-2018] A Coral Polifónica Antonio Santomil de Bugallido organiza este sábado, coa colaboración do Concello de Ames e da Deputación da Coruña, un concerto na honra de Santa Icía, patroa dos músicos. O acto, que se levará a cabo na Casa da Cultura do Milladoiro ás 19.00h, contará coa actuación da Coral Arumes do Castro de Cerdido, das Pandereteiras da Costaneira e da propia Coral Polifónica Antonio Santomil de Bugallido.

[16-11-2018] A Xunta de Goberno Local vén de aprobar o expediente de contratación, mediante procedemento aberto simplificado, das obras de pavimentación dos viarios da urbanización das Mimosas, en Biduído. O importe do contrato é dun total de 85.309,19 euros, IVE incluído. Estas actuacións están incluídas no Plan Complementario do POS+ 2018.

[16-11-2018] O Concello de Ames, a través do departamento de Persoal, fai público o anuncio do resultado dos exercicios da fase de oposición do proceso selectivo para a creación dunha bolsa de traballo de mestres/as de frauta para a Escola Municipal de Música do Concello de Ames. Establécese un prazo para a presentación de alegacións que vai ata o 19 de novembro (o 19 incluído) de 2018 . Premendo no enlace que está a túa dereita, baixo o apartado de descargas, poderás obter os devanditos anuncios.