[21-11-2018] Este venres, 23 de novembro, a compañía de teatro de títeres Tanxarina representa na Casa de Cultura de Bertamiráns o seu espectáculo A galiña azul. A peza, na que conviven actores e marionetas, é unha adaptación da obra homónima de teatro infantil de Carlos Casares. As entradas para a obra xa se poden retirar na @Billeteira, a través da páxina web do Concello de Ames.

[20-11-2018] A empresa amesá de tecnoloxía, Tecalis Innovación, que ten a súa sede no polígono Novo Milladoiro, impartirá este sábado, 24 de novembro, un dos actos da axenda oficial da Mobile Week, que coordinan os organizadores de Mobile World Congress. Por primeira vez a Mobile Week celebrase fóra de Barcelona, e será na cidade da Coruña, do 21 ao 28 de novembro. Este taller práctico terá como obxectivo explicar aos cidadáns interesados en Blockchain o que é esta tecnoloxía, os seus fundamentos e nocións básicas así como comprar e xestionar criptomonedas desde os seus dispositivos móbiles de forma sinxela. Dito obradoiro ten un aforo de 30 persoas, pero se se rexistra máis xente, poderase repetir ao longo da xornada do sábado.

[20-11-2018] Baseada no libro homónimo de Montse Fajardo, a peza teatral Invisibles chega á Casa da Cultura do Milladoiro para presentar ante o público unha serie de historias reais de mulleres galegas, unidas pola crueldade da violencia de xénero. A obra, dirixida por Marián Bañobre, está interpretada por Mela Casal, Sheyla Fariña e Nieves Rodríguez. As entradas para asistir ao espectáculo, que terá lugar este venres, 23 de novembro, ás 21.00h, xa están dispoñibles na Billeteira electrónica, cun prezo de cinco euros, con descontos do 50% para persoas maiores de 65 anos e estudantes con carné.

[19-11-2018] O salón de actos do IES do Milladoiro acolle os mércores 21 e 28 deste mes de novembro dúas novas sesións de Espazos para Reflexionar. No encontro do mércores 21 falarase sobre como traballar a autonomía dos e das nenas/os de 0 a 6 anos, mentres que o próximo mércores 28, a charla centrarase en como falar da sexualidade con adolescentes. Ambas sesións serán conducidas por Yolanda Gómez Bombín, pedagoga e traballadora de servizos sociais do Concello de Noia. O proxecto, que naceu o curso anterior da man da ANPA Milla, en colaboración co instituto do Milladoiro, abarca este ano a toda a comunidade educativa da localidade, ao contar coa implicación das ANPAS das escola infantil A Galiña Azul Figueiras – Ames, da escola infantil municipal A Madalena, da EEI Millapeques e da ANPA As Brañas do CEP de Ventín.