O xoves, 20 de xuño, remata o curso lectivo 2023/2024 na Escola Municipal de Música de Ames. Como soe ser tradicional, para pechar o curso realízase un concerto, que se desenvolverá ás 19.30 horas no aparcadoiro da Casa da Cultura do Milladoiro. Participará alumnado repartido en diferentes agrupacións, onde poderán despregar todo o seu talento e demostrar así todo o aprendido durante o curso. Escoitarase un repertorio musical moi variado, que inclúe pezas de estilo tradicional, clásico e moderno.

O venres 21 de xuño, ás 18:00 horas, Alouette Machine levará ao Pazo da Peregrina de Bertamiráns o obradoiro "Fotografando as herbas de San Xoán". Dirixido a nenos e nenas a partir de 3 anos, trátase dun obradoiro no que se realizarán fotocomposicións empregando a luz do sol e a auga. Ademais servirán para ir aprendendo a recoñecer as herbas de san Xoán ao tempo que se pon en valor a lingua e o patrimonio cultural e ambiental.

Hoxe, ás 17:30 horas, partirá do centro de saúde do Milladoiro a andaina saudable de SaúdeAndo . As sesións, para as non é precisa inscrición previa, duran entre unha hora e hora e media, e teñen unha dificultade media-baixa. Estas saídas contan sempre coa presenza dun monitor de marcha nórdica, pensando nas persoas que desexen practicar esta modalidade (sempre de maneira voluntaria).

O Concello de Ames, a través da Escola Municipal de Música de Ames, organiza unha velada de violín a cargo de Anxo Gómez Piñeiro, veciño do Milladoiro, que xa conta con numerosas distincións e premios. En 2022 recibiu unha mención de honra pola súa participación no Concurso Internacional Violin Competition, na categoría de menores de 21 anos. O concerto será ás 20:00 horas no auditorio da Casa da Cultura do Milladoiro.